އުރީދޫ މޯލްޑިވްސްގެ އީ-ވޮލެޓު، 'އެމް-ފައިސާ'ގެ ހިދުމަތް ދިނުމަށް އުފެއްދި ސަބްސިޑަރީ ކުންފުނި ޓެކްފިން މޯލްޑިވްސް ޕްރައިވެޓް ލިމިޓެޑުގެ 100 ޕަސެންޓު ހިއްސާ އޯއެފްޓީ އިންޓަނޭޝަނަލް އަށް ބަދަލު ކުރަން ފާސްކޮށްފި އެވެ.
މި ގޮތަށް ފާސްކޮށްފައި ވަނީ ރޭ އޮންލައިންކޮށް ބޭއްވި އުރީދޫ މޯލްޑިވްސްގެ ހާއްސަ ގޮތުން ކުރާ އާންމު ޖަލްސާ (އީޖީއެމް)ގަ އެވެ.
އާ އަހަރުން ފެށިގެން އަމަލު ކުރަން ފަށާ މި ބަދަލާއެކު ޓެކްފިން ހިދުމަތްތައް ދިނުމަށް އުރީދޫ ގްރޫޕުގެ ކުންފުނިތަކުން އުފައްދާފައިވާ ސަބްސިޑަރީ ކުންފުނިތަކަށް ވެސް ފައިދާވާނެ ކަމަށް އުރީދޫން ބުނެއެވެ.
އުރީދޫ ގްރޫޕުގެ ދަށުން ހިންގާ ކުންފުނިތަކުން އުފައްދާފައިވާ ހުރިހާ ޓެކްފިން ކުންފުންޏެއް އޯއެފްޓީގެ ދަށުން ހިންގާ ގޮތަށް ބަދަލު ކުރުމަކީ އުރީދޫ ގްރޫޕުގެ ސްޓްރެޓެޖިކް ޕްލޭނުގައި ހިމެނޭ ކަމަކަށްވާއިރު އޯޓީއެފްގެ ދަށަށް ޓެކްފިން މޯލްޑިވްސް ކުންފުނި ބަދަލު ކުރަން ހުށަހެޅީ އެ ޕްލޭނުގެ ދަށުންނެވެ.
އެމް-ފައިސާ ޕްލެޓްފޯމްގެ ސަބަބުން ރާއްޖޭގެ އެކި ކަންކޮޅުތަކުގައި މާލީ މުއާމަލާތްތަކަށް އިންގިލާބީ ބަދަލުތަކެއް ގެނެސް، ފައިސާ ދެއްކުމާއި ފައިސާ ޓްރާންސްފާ ކުރުމާއި ރެމިޓެންސްގެ ހިދުމަތް ހޯދުމުގައި ފަސޭހަ އަދި ހަރުދަނާ މަގު ފަހިކޮށްދީފައެވެ.
އެމް-ފައިސާ މެދުވެރިކޮށް ބިލްތައް ދެއްކުމާއި ޕެޓްރޯލް ޝެޑްތަކާއި ފިހާރަ އަދި ކެފޭތަކުގައި ވެސް ފައިސާގެ މުއާމަލާތް ކުރެވޭނެ އެވެ. އަދި ސަރުކާރުގެ ބަނޑޭރިޕޭގެ ތެރޭގައި ވެސް އެމް-ފައިސާ ހިމެނެ އެވެ.
