އެއްގަމު އަދި ކަނޑު އުޅަނދުތަކުގެ އަހަރީ ފީ އާއި އެ ފީ ނުދެއްކުމުން އަރާފައިވާ ޖޫރިމަނާތައް އިންސްޓޯލްމަންޓް އުސޫލުން ބަހާލައިގެން ދެއްކުމުގެ ފުރުސަތު ލިބޭ ގޮތަށް ހަމަޖައްސައިފިއެވެ.
ޓްރާންސްޕޯޓް މިނިސްޓްރީން ވަނީ އެއްގަމު އުޅަނދާއި ކަނޑު އުޅަނދު ފަހަރާ ގުޅޭގޮތުން ދައްކަން ޖެހޭ އަހަރީ ފީ އާއި ޖޫރިމަނާގެ ފައިސާ ބަހާލައިގެން ދެއްކުމުގެ ގަވާއިދު" މިއަދު ގެޒެޓުކޮށްފައިވާއިރު، އެ ގަވާއިދުގައިވާ ގޮތުން ފަސް ޝަރުތެއް ހަމަވާ މީހުންނަށް އަހަރީ ފީ އާއި ޖޫރިމަނާގެ ފައިސާ ބަހާލައިގެން ދެއްކުމުގެ ފުރުސަތު ލިބޭނެއެވެ.
- ދައްކަން ޖެހި ނުދައްކާ ހުރި ފައިސާގެ އަދަދު 10،000ރުފިޔާ އަށް ވުރެ އިތުރުވެފައިވުން
- އިންސްޓޯޅްމަންޓަށް ފައިސާ ދައްކަން އެދޭ ފަރާތަކީ އުޅަނދުގެ ވެރިފަރާތް ކަމުގައިވުން.
- މީގެކުރިން ބަހާލައިގެން ފައިސާ ދެއްކުމުގެ ފުރުސަތު ދީފައިވާ ފަރާތަކަށް ނުވުން
- ގަވާއިދުގެ ދަށުން ފައިސާ ބަހާލައިގެން ދައްކަން އަމިއްލައަށް ހުށަހެޅުން
- ފައިސާ ދެއްކުމުގެ މުއްދަތު ހަމަވެފައިވުން
ބަހާލައިގެން ޖޫރިމަނާގެ ފައިސާ ދައްކަން ކޮމިޓްމަންޓް ފީއެއް ދެއްކަންޖެހޭއިރު މި ފީ ދައްކަން ލިބޭ 14 ދުވަހުގެ ތެރޭގައި ނުދައްކައިފިނަމަ، ބަހާލައިގެން ޖޫރިމަނާގެ ފައިސާ ދެއްކުމުގެ ފުރުސަތު ގެއްލޭނެއެވެ.
މިއަދު ގެޒެޓުކުރި ގަވައިދުގެ ދަށުން ކަނޑައަޅާފައިވާ ކޮމިޓްމަންޓް ފީ ދެއްކުމުން މިނިސްޓްރީން އެއްބަސްވުމެއް އެކުލަވާލާނެއެވެ. މި އެއްބަސްވުމުގައި އިންސްޓޯލްމަންޓްގެ ގޮތުގައި ކޮންމެ މަހަކު ދައްކަން ޖެހޭ އަދަދު ކަނޑައަޅަނީ ކޮމިޓްމަންޓް ފީގެ ގޮތުގައި ދެއްކި އަދަދުން އެ ބައި އުނި ކުރުމަށް ފަހު އެވެ.
އެ ގަވާއިދުގައިވާ ގޮތުން އެއްބަސްވުމުގައި ސޮއިކުރާތާ 30 ދުވަސް ތެރޭ ފައިސާ ނުދައްކައިފިނަމަ، އެއްބަސްވުން ބާތިލް ކުރުމުގެ އިހްތިޔާރު މިނިސްޓްރީއަށް ލިބިގެންވެއެވެ.
