ޓެކްސީ ޑްރައިވަރުންގެ ކަންބޮޑުވުންތަކަށް ހައްލު ނުލިބޭތީ ޓެކްސީ ޑްރައިވަރުން އިހްތިޖާޖުކޮށްފިއެވެ.
ޓެކްސީ ޑްރައިވަރުން އިހްތިޖާޖުކޮށްފައި ވަނީ ހުޅުމާލެ ރުއްގަނޑު ސަރަހައްދު 1 ގައި މިއަދު ހަވީރުއެވެ.
"ބޯ ކަނޑާލެވިދާނެ އެކަމަކު ބޯ ގުދެއް ނުކުރާނަން"ގެ ނަމުގައި ޓެކްސީ ޑްރައިވަރުން މިއަދު ކުރިއަށް ގެންދިޔަ މި އިހްތިޖާޖުގައި ވަނީ ޓްރާންސްޕޯޓް މިނިސްޓަރު މުހައްމަދު އަމީންގެ އިސްތިއުފާއަށް ވެސް ގޮވާލާފައެެވެ.
އިހްތިޖާޖުގައި ބައިވެރިވި ޓެކްސީ ޑްރައިވަރުން ތިބީ އެ މީހުންގެ ޝުއޫރުތައް ލިޔެފައިވާ ޕޯސްޓަރުތަކެއް ހިފައިގެންނެވެ. އެގޮތުން އެ ޕޯސްޓަރުތަކުގައި ލިޔެފައިވާ ޝުއޫރުތަކުގެ ތެރޭގައި "ޓެކްސީ ހިދުމަތް ދިނުމަށް ފަހިވާ ގޮތަށް ޓްރާންސްޕޯޓްގެ ޒިންމާ އަދާކުރޭ"، "ޕާކިން ބިލްޑިންތައް ކޮބާ؟" އަދި "ޓެކްސީ ފްލީޓްގެ ބަދަލުގައި މި ހިދުމަތް ރަނގަޅު ކުރުމަށް އެހީތެރިވެދެއްވާ" މިފަދަ ޝުއޫރުތައް ހިމެނެއެވެ.
ސަރުކާރުން ޓެކްސީ ފްލީޓެއް ހެދުމަށް ނިންމުމާ ގުޅިގެން ވެސް ޓެކްސީ ޑްރައިވަރުން ވަނީ ކަންބޮޑުވުން ފާޅުކޮށްފައެވެ. އަދި މިކަމާ ގުޅޭގޮތުން ރައީސް ޑރ. މުހައްމަދު މުއިއްޒުއާ ބައްދަލުކުރަން އެދިފައިވާ ކަމަށް އިހްތިޖާޖުގެ ބައިވެރިން ވަނީ ބުނެފައެވެ.
ސަރުކާރުން ޓެކްސީ ފްލީޓްއެއް ހަދަން ނިންމުމާ ގުޅިގެން މިދިޔަ އޮގަސްޓް މަހު ވެސް މާލޭގެ ޓެކްސީ ޑްރައިވަރުން ވަނީ އިހުތިޖާޖު ކޮށްފައެވެ.
ސަރުކާރުން ޓެކްސީ ލައިނެއްގެ ހިދުމަތް ފެށުމަށް ނިންމާ އެކަން އިއުލާންކޮށްފައި ވަނީ "މާލެ ފަހި ޕްރޮގްރާމް"ގެ ތެރެއިންނެވެ. ދުނިޔޭގެ ކުރިއަރާފައިވާ ގައުމުތަކުގައި އަމަލުކުރަމުން ގެންދާގޮތަށް، ޒަމާނީ، ސަލާމަތީ ގޮތުން ރައްކާތެރި އަދި އިތުރުބާރު ހިފޭ ޓެކްސީ ލައިނެއް ތައާރަފްކޮށް ހިދުމަތް ދިނުމަކީ މުހިއްމު ކަމެއް ކަމަށް ސަރުކާރުން ދެކެއެވެ.
