އޮމާން އާއި ރާއްޖޭގެ ޒަމާންވީ ގުޅުން އިތުރަށް ބަދަހިކުރުމަށް މަޝްވަރާކޮށްފިއެވެ.
ފޮރިން މިނިސްޓަރު އަބްދުﷲ ހަލީލް އެކްސްގައި ކުރެއްވި ޕޯސްޓެއްގައި ވިދާޅުވީ ރާއްޖޭގައި އިންވެސްޓްކުރެވެން ހުރި ދާއިރާތަކާ ބެހޭގޮތުން އޮމާންގެ މާލީ ވަޒީރު ސުލްތާން ބިން ސާލިމް ބިން ސާއިދު އަލް ހަބްސީއާއެކު މަޝްވަރާކުރެވިފައިވާ ކަމަށާއި، އަދި ދިވެހި ސަރުކާރުގެ ތަރައްގީގެ ސިޔާސަތުތަކާއި ގުޅޭގޮތުން މަޝްވަރާ ކުރެވިފައިވާ ކަމަށެވެ.
ފޮރިން މިނިސްޓަރު ވިދާޅުވީ ތައުލީމާ، ފަތުރުވެރިކަމުގެ ދާއިރާއާއި، ވިޔަފާރީގެ ދާއިރާ އިތުރަށް ތަރައްގީކުރުމަށްވެސް އޮމާނާއެކު މަޝްވަރާކުރެވިފައިވާ ކަމަށެވެ.
ހަލީލް އޮމާނަށް ކުރައްވަމުން ގެންދަވާ ދަތުރަކީ އެ ގައުމުގެ ހާރިޖީ ވަޒީރު ސައްޔިދު ބަދުރު ބިން ހަމަދު ބިން ހަމޫދު އަލްބުސައީދީގެ ދައުވަތަކަށް ކުރައްވާ ދަތުރެކެވެ.
މި ދަތުރުގައި އޮމާންގެ ހާރިޖީ ވަޒީރާ ބައްދަލުކުރައްވާ މުހިންމު މަޝްވަރާތަކެއް ކުރެއްވުމަށް ހަމަޖެހިފައިވާކަމަށްވެސް މިނިސްޓަރު ހަލީލް ވަނީ ވިދާޅުވެފައެވެ.
މި ދަތުރުގައި މިނިސްޓަރު ހަލީލާއެކު ސެކްރެޓަރީ ބައިލެޓަރަލް ޑރ. ހާލާ ހަމީދާއި ސީނިއާ އަންޑާ ސެކްރެޓަރީ ފާތިމަތު ނައީމާ ވަނީ ބައިވެރިވެ ވަޑައިގެންފައެވެ.
