ފުވައްމުލަކު ސިޓީގައި ފުޅާ ދާއިރާއެއްގައި މަސްތުވާތަކެތީގެ ނެޓްވޯކް ހިންގަމުންދިޔަ 2 މީހަކު ހައްޔަރުކޮށް، 28 މިލިއަނަށްވުރެ ގިނަ ރުފިޔާގެ މުއާމަލާތް ދެނެގަނެއްޖެއެވެ.
ފުވައްމުލައް ސިޓީގައި ނެޓްވޯކް ހަދައިގެން މަސްތުވާތަކެތީގެ ވިޔަފާރިކޮށް މަނީލޯންޑާ ކުރުމުގައި އިސްވެ ހަރަކާތެރިވާކަމުގެ ތުހުމަތުގައި ކޯޓު އަމުުރެއްގެ ދަށުން ހައްޔަރުކޮށްފައި ވަނީ ޏ. ފުވައްމުލައް/ ދޫޑިގަން، ކަރަންކާވިލާ، އަހްމަދު ނިއުޝާދު (34އ) އަދި ޏ. ފުވައްމުލައް/ ދޫޑިގަން، ޒަމާނީގެ، ހަސަން އާޒިމް (29އ)އެވެ.
ތަހުގީގަށް ހޯދިފައިވާ ގޮތުގައި ފާއިތުވި 5 އަހަރު ތެރޭގައި އަހްމަދު ނިއުޝާދުގެ ބޭންކް އެކައުންޓް މެދުވެރިކޮށް 21 މިލިއަނަށްވުރެ ގިނަ ރުފިޔާގެ މުއާމަލާތް ހިންގާފައިވާ ކަމަށް ފުލުހުން ބުނެއެވެ. އަދި ފާއިތުވި 2 އަހަރު ތެރޭގައި ހަސަން އާޒިމްގެ ބޭންކް އެކައުންޓް މެދުވެރިކޮށް 7 މިލިއަނަށްވުރެ ގިނަ ރުފިޔާގެ މުއާމަލާތް ހިންގާފައިވާ ކަމަށް ވެސް ފުލުހުން ވަނީ ބުނެފައެވެ.
ފުލުހުން ބުނީ މި މައްސަލައާ ގުޅިގެން 21 މީހަކާއި 2 ކުންފުންޏެއްގެ އެކައުންޓް ކޯޓު އަމުރުގެ ދަށުން ހިފަހައްޓައި، މި ފަރާތްތަކުގެ މައްޗަށް ތުހުމަތު ކުރެވޭ މަނީ ލޯންޑަރިންގެ މައްސަލަ ތަހުގީގުކުރަމުންދާ ކަމަށެވެ.
މަސްތުވާތަކެތީގެ ވިޔަފާރިއާ ދެކޮޅަށް މިދިޔަ ޖެނުއަރީ މަހުގެ 14 ވަނަ ދުވަހުން ފެށިގެން ފުވައްމުލައް ސިޓީގައި "އޮޕަރޭޝަން ވެށި ރައްކަލް"ގެ ނަމުގައި ހިންގަމުންދާ އޮޕަރޭޝަންގައި ފުވައްމުލައް ސިޓީގައި ފުޅާ ދާއިރާއެއްގައި މަސްތުވާތަކެތީގެ ވިޔަފާރިކޮށް މަނީ ލޯންޑާ ކުރުމުގައި އިސްކޮށް ހަރަކާތްތެރިވާ ކަމަށް ތުހުމަތުކުރެވޭ ފަރާތްތަކާއި އެ ފަރާތްތަކަށް އެހީތެރިވާ ފަރާތްތައް ދެނެގަނެވިފައިވާ ކަމަށް ފުލުހުން ބުނެއެެވެ.
ފުލުހުން ބުނީ މި އޮޕަރޭޝަނުގެ ދަށުން މިހާތަނަށް 4،048 ހޮޓްސްޕޮޓް ބަލައި ފާސްކޮށް، 1،147 މީހުން ހުއްޓުވައި ސުވާލުކޮށް، ބަލައި ފާސްކޮށް، 58 މީހަކު ހައްޔަރުކޮށްފައިވާ ކަމަށެވެ. އަދި ހައްޔަރުކުރި މީހުންގެ މައްޗަށް ތުހުމަތު ކުރެވޭ ޖުމުލަ 75 މައްސަލައެއް ތަހުގީގުކޮށް، 65 މައްސަލައެއްގެ ތަހުގީގު ނިންމައި ދައުވާ ކުރުމަށް ޕްރޮސިކިއުޓާ ޖެނެރަލްގެ އޮފީހަށް ފޮނުވާފައިވާކަން ފުލުހުން ވަނީ ފާހަގަކޮށްފައެވެ.
ތިމީހުން ވެސް ސާބިތު ނުވެގެން ދޫކޮށްލާނެ....ޙައްލަކީ ޢުމަރު.