އާންމު ދިރިއުޅުމަށް ބޭނުންކުރާ ހިދުމަތުގެ ކަރަންޓު ބިލުގެ ޖޫރިމަނާ މައާފުކުރަން ދީފައިވާ މުއްދަތު މި މަހުގެ ނިޔަލަށް ހަމަވާނެ ކަމަށް ސްޓެލްކޯއިން ބުނެފިއެވެ.
އާންމު ދިރިއުޅުމަށް ބޭނުންކުރާ ހިދުމަތުގެ ކަރަންޓު ބިލުތަކަށް ޖޫރިމަނާގެ ގޮތުގައި އަރާފައިވާ ފައިސާ މައާފުކޮށްދެއްވުމަށް ރައީސް ޑރ. މުހައްމަދު މުއިއްޒުގެ ނިންމެވުމާއެކު ޖޫރިމަނާއާއި ނުލާ ފައިސާ ދެއްކޭނެ އިންތިޒާމު ހަމަޖައްސާފައި ވަނީ މިދިޔަ އޭޕްރިލް މަހުން ފެށިގެންނެވެ.
ޖޫރިމަނާ މާފުކޮށްދިނުމަށް ނިންމާފައި ވަނީ ހަމައެކަނި އާންމު ދިރިއުޅުމަށް ބޭނުންކުރާ ހިދުމަތުގެ ބިލުތަކުން (ޑޮމެސްޓިކް ކަސްޓަމަރުންނަށް)ކަން ސްޓެލްކޯއިން ވަނީ ފާހަގަކޮށްފައެވެ. އަދި ޖޫރިމަނާ މައާފުކުރެވޭނީ މިދިޔަ އަހަރުގެ ޑިސެމްބަރު 31 ގެ ނިޔަލަށް ހަދާފައިވާ ކަރަންޓު ބިލުތަކުގެ ތެރެއިން ފައިސާ ނުދައްކާހުރި ބިލުތަކަށް ކަމަށް އެ ކުންފުނިން ބުނެއެވެ.
ސްޓެލްކޯއިން ބުނީ ޑިސެމްބަރު 31، 2023 ގެ ނިޔަލަށް ހަދާފައިވާ ބިލުތަކުގެ ތެރެއިން ފައިސާ ނުދައްކާހުރި ބިލުތަކުގެ ޕްރިންސިޕަލް އަދަދު (ޖޫރިމަނާއާއި ނުލާ ބާކީ އަދަދު) ދެއްކުމުން ޖޫރިމަނާ އެމުއްދަތާ ހަމައަށް ބިލަށް އަރާފައިވާ ޖޫރިމަނާ މައާފުކުރެވޭނެ ކަމަށެވެ.
ޑިސެމްބަރު 31، 2023ގެ ނިޔަލަށް ހަދާފައިވާ ބިލުތަކަށްވާ ފައިސާގެ އަދަދު ޖޫރިމަނާއަކާ ނުލައި ދެއްކޭނީ މި މަހުގެ 31ގެ ނިޔަލަށް ކަމަށް ސްޓްލްކޯއިން ބުނެއެވެ. އެގޮތުން، ޖޫރިމަނާއާއި ނުލާ ބާކީ އަދަދު ދެއްކޭނެގޮތަށް ބިލުތަކަށް ވަގުތީ ގޮތުން އެޖަސްމެންޓެއް ހިމަނާފައިވާކަން ސްޓެލްކޯއިން ވަނީ ފާހަގަކޮށްފައެވެ.
ސްޓެލްކޯއިން ބުނީ އެ ބިލުތަކަށް މި މިމަހުގެ 31ގެ ނިޔަލަށް ޔޫސޭޖް އަދަދު (ޕްރިންސިޕަލް އަދަދު) ދައްކާ ހަލާސްނުކުރެވޭނަމަ، މި ބިލުތަކުން އެޖަސްޓުކުރެވިފައިވާ ޖޫރިމަނާ އަދަދު އަންނަ މަހުގެ ފުރަތަމަ ދުވަހުން ފެށިގެން ބިލުތަކުގައި ހިމެނިގެންދާނެއެވެ.
