ސްޓޭޓް ޓްރޭޑިންގް އޯގަނައިޒޭޝަން (އެސްޓީއޯ) ބޯޑު މެންބަރުން ހާޒިރުކުރަން ރައްޔިތުންގެ މަޖިލީހުގެ މާލިއްޔަތު ކޮމިޓީން މިއަދު ފާސްކޮށްފި އެވެ.
އެސްޓީއޯގެ ބޯޑު މެންބަރުން މަޖިލީހަށް ހާޒިރުކުރަން ނިންމާފައި ވަނީ އެ ކުންފުނީގެ ދަށުން ހިންގާ އެފްއެސްއެމް މެދުވެރިކޮށް ދޭ ތެލުގެ ހިދުމަތުން ބޮޑެތި ކޮރަޕްޝަންތައް ހިންގާފައިވާ ކަމުގެ ތުހުމަތުކޮށެވެ.
ސަރުކާރު ތެޔޮ ކުންފުނި އެފްއެސްއެމްގެ މުވައްޒަފުންތަކެއް ތެލުން ވައްކަންކޮށް، އޭގެން ލިބޭ ފައިސާ ލޯންޑާކުރާ މައްސަލައެއް ބަލަން ފަށާފައިވާކަން ދާދިފަހުން އިއުލާން ކުރައްވާފައި ވަނީ ހޯމްލޭންޑް ސެކިއުރިޓީ މިނިސްޓަރު އަލީ އިހްސާންއެވެ.
އިހުސާނު އޭރު ވިދާޅުވި ގޮތުގައި އެ މައްސަލައާއި ގުޅިގެން ވަނީ 10 މީހަކާއި ދެ ގެއަކާއި ދެ ބާޖެއް ބަލައި ފާސްކޮށް މައްސަލައާ ގުޅުންހުރި ލިޔެކިއުންތަކާއި އިލެކްޓްރޯނިކް ވަސީލަތްތައް ހޯދާފައި ވެއެވެ.
އެއާއެކު މިއަދު ބޭއްވި މާލިއްޔަތު ކޮމިޓީގެ ބައްދަލުވުމުގައި، މަޖިލީހުގެ ނައިބު ރައީސް އަދި ދިއްގަރު ދާއިރާގެ މެމްބަރު އަހުމަދު ނާޒިމް ވަނީ ތެލުން ވައްކަން ކުރުމަކީ މިހާރު ވެސް ހިނގަމުންދާ ކަމެއް ކަމަށާއި އެކަން އެސްޓީއޯގެ ބޯޑުގެ އޮޑިޓު ކޮމިޓީން ކުރި ތަހުގީގުން ވެސް ހާމަވެފައިވާ ކަމަށް ވިދާޅުވެފައެވެ. އެގޮތުން ނާޒިމް ފާހަގަ ކުރެއްވި ގޮތުގައި އެފްއެސްއެމްގެ ތެރެއިން 50 މިލިއަން ރުފިޔާގެ ބޮޑު ހިޔާނާތެއް ހިންގާފައިވާ ކަމުގެ މައުލޫމާތު ލިބިފައިވާ ކަމަށް ވިދާޅުވެފަ އެވެ.
އެހެންކަމުން އެސްޓީއޯގެ ބޯޑުގެ މެމްބަރުންގެ އިތުރުން އޮޑިޓު ކޮމިޓީގެ ބޭފުޅުން ކޮމިޓީއަށް ހާޒިރުކޮށް، އެ ހިޔާނާތުގެ މައުލޫމާތު ސާފު ކުރުމަށް އޭނާ ވަނީ ކޮމިޓީއަށް ހުށަހަޅުއްވާފައެވެ. އަދި އެ ގޮތަށް ކޮމިޓީގެ ބައްދަލުވުމުގައި ބައިވެރިވެވަޑައިގެންނެވި މެމްބަރުންގެ އިއްތިފާގުން ވަނީ ފާސްކޮށްފައެވެ.
މީގެ އިތުރުން އެމްޕީއެލްގެ ތެލުގެ ހިޔާނާތާއި ފްލެޓު މަޝްރޫއުގައި އޮޑިޓުން ފާހަގަކޮށްފައިވާ ކޮރަޕްޝަނާ ގުޅޭ މަސައްކަތުގެ ފަހުގެ ތަފްސީލު ހޯދުމަށް އެ ކުންފުނީގެ ބޯޑާއި ކަމާގުޅޭ ވެރިން ހާޒިރުކުރަން ވެސް މާލިއްޔަތު ކޮމިޓީން މިއަދު ވަނީ ފާސްކޮށްފައެވެ. އެއީ މާލޭ ކޮމާޝަލް ހާބަރުގައި އެމްޕީއެލްއިން ހިންގާ އޮޕަރޭޝަންތަކުގެ ބޭނުމަށް 2018 ވަނަ އަހަރުން ފެށިގެން 2020 ވަނަ އަހަރުގެ ނިޔަލަށް އުޅަނދުތަކާއި ޖަނަރޭޓަރުތަކަށް ގަތް ޑީސަލްގެ ތެރެއިން ހިންގި ހިޔާނާތާއި ގުޅޭ މައްސަލައެވެ.
އެކަމަށް އޮޑިޓު އޮފީހުން ތައްޔާރުކުރި ހާއްސަ އޮޑިޓު ރިޕޯޓުގައި ބުނެފައިވަނީ، އެ މުއްދަތުގެ ތެރޭގައި 8.85 ލީޓަރުގެ ޑީސަލް އޮޕަރޭޝަންތަކަށް ބޭނުންވެގެން ގަނެފައިވާ ކަމަށެވެ. ނަމަވެސް، އެމްޕީއެލްއިން ޑީސަލް ގަނެފައިވާ ރޭޓަށް ބަލާއިރު، އުޅަނދުތަކާއި ޖަނަރޭޓަރުތަކަށް ބޭނުންނުކޮށް، 2.82 މިލިއަން ލީޓަރުގެ ޑީސަލް ގެއްލިފައިވާ ކަމަށް ރިޕޯޓުގައި ބުންޏެވެ.
މިއީ، އެ މުއްދަތުގައި ޖުމްލަކޮށް ގަތް ލީޓަރުގެ 31.9 ޕަސަންޓު ކަން ފާހަގަކޮށްފައިވާއިރު، ހިޔާނާތުގެ ތެރެއިން ގެއްލިގެންދިޔަ ޑީސަލްގެ އަގު 28.31 މިލިއަން ރުފިޔާއަށް އަރާ ކަމަށް އޮޑިޓުން ދައްކަ އެވެ.
