މާލެ އައި ހުޅުމާލޭގައި އެފްއެސްއެމުން ހިންގާ ޝެޑުތަކުން ފުޅިއަށް އަދި ހަންހަމަށް ތެޔޮދޫކުރާ އުސޫލަށް ބަދަލުގެނައުމަށް ނިންމާފައިވާކަމަށް އެފްއެސްއެމް އިން ބުނެފިއެވެ.
އެފްއެސްއެމް އިން ބުނީ އެކުންފުނިން މާލެ އަދި ހުޅުމާލޭގައި، އެއްގަމު އުޅަންދުފަހަރަށް ތެޔޮ ވިއްކުމަށް ހެދިފައިވާ ޝެޑުތަކުން ހަންހަމަށާއި ފުޅިއަށް ތެޔޮ އަޅައިދިނުމުގައި އަމަލުކުރަމުންގެންދާ އުސޫލަށް ފެބްރުއަރީ މަހުގެ 1 ވަނަ ދުވަހުން ފެށިގެން ބަދަލު ގެނައުމަށް ނިންމާފައިވާ ކަމަށެވެ.
އެފްއެސްއެމްއިން އިން ބުނީ ފުޅިއަކަށް ކަސްޓަމަރަކަށް ގިނަވެގެން ދޫކުރެވޭނީ ދުވާލަކަށް 3 ލީޓަރު ފުޅިކަމަށެވެ. އަދި ފުޅިއަށް ތެޔޮ އަޅާދެވޭނީ އެ ކަސްޓަމަރެއްގެ އައިޑީކާޑު ހުށަހެޅުމުންކަމަށް އެފްއެސްއެމްއިން ވަނީ ބުނެފައެވެ. އިތުރަށް އެފްއެސްއެމް އިން ބުނީ ހަންހަމަށް ތެޔޮ ދޫކުރެވޭނީ، ޑިންގީ ނުވަތަ ލޯންޗެއްގެ ރަޖިސްޓްރީއަށް ބަލައި، ދުވާލަކަށް ގިނަވެގެން 80 ލީޓަރުކަމަށެވެ.
މީގެ އިތުރުން އެފްއެސްއެމްއިން ބުނީ މި ބަދަލުތައް ގެނައުމަށް ނިންމާފައިވަނީ، ސަލާމަތީ މިންގަނޑުތަކަށް ބަލައި އުސޫލަށް ބަދަލު ގެންނަން ފެންނާތީކަމަށެވެ. އަދި މިއީ ދުމަތް ލިބިގަންނަ ފަރާތްތަކަށް އަވަހަށް ހިދުމަތް ފޯރުކޮށްދިނުމަށް ގެނެވުނު ބަދަލެއްކަމަށް އެފްއެސްއެމްއިން ވަނީ ބުނެފައެވެ.
