ފިއުލް ސަޕްލައި މޯލްޑިވްސް (އެފްއެސްއެމް) ގެ ތެޔޮ ގެންދާ ބޯޓެއް ގއ. ނިލަންދޫ ހުޅަނގު އުތުރު ފަރާތު ފަރަށް އަރައިފިއެވެ.
ނިލަންދޫ ކައުންސިލުގެ ރައީސް ނާސިހު އިބްރާހިމް 'ދަ ޕްރެސް' ނޫހަށް މައުލޫމާތު ދެމުން ވިދާޅުވީ ފަރަށް ބޯޓު އެރި ސީދާ ސަބަބު އަދި ސާފުވެފައި ނުވާކަމަށެވެ. އެފްއެސްއެމް ބޯޓާއި ހަވާލާދީ ނާސިހު ވިދާޅުވީ ފަރަށް ބޯޓު އެރުމުގެ ސަބަބުން ބޯޓަށް އެއްވެސް ގެއްލުމެއް ލިބިފައި ނުވާކަމަށެވެ. އަދި ބޯޓަށް އެހީތެރިކަން ފޯރުކޮށްދިނުމަށް މިހާރު އެފްއެސްއެމްގެ އެހެން ބޯޓަށް އެ ސަރަހައްދަށް ދަތުރުކުރަމުން އަންނަކަމަށެވެ.
އިތުރަށް ނާސިހު ވިދާޅުވީ އެ ބޯޓު ފަރަށް އެރިކަމުގެ މައުލޫމާތު ލިބުމާ އެކު އެކަން ކަމާ ބެހޭ ފަރާތްތަކަށް އަންގާފައިވާނެ ކަމަށެވެ. އަދި އެއްވެސް ވަރަކަށް ތެޔޮ ލީކުވަމުންދާތޯ ވެސް ބަލަމުންދާކަމަށާއި ބޯޓު ފަރަށް އެރުމުގެ ސަބަބުން ލިބިފައިވާ ގެއްލުންތައްވެސް ބަލާނެކަމަށް ނާސިހު ވިދާޅުވިއެވެ.
އެފްއެސްއެމްގެ މި ތެޔޮ އުފުލާ އެ ބޯޓަކީ އަތޮޅު ތެރޭގައި ރަށްތަކަށް ތެޔޮ ހިފައިގެން ދަތުރުކުރާ ބޯޓެކެވެ.
