ދިވެހިރާއްޖޭގެ ގާނޫނު އަސާސީއަށް ގެނެސްފައިވަނީ އިސްލާހެއް ނޫން ކަމަށާއި، އެއީ ގާނޫނު އަސާސީ ގަޑުބަޑު ކުރުން ކަމަށް ކުރީގެ ނައިބު ރައީސް ފައިސަލް ނަސީމް ވިދާޅުވެއްޖެއެވެ.
"ގާނޫނު އަސާސީގެ ދިފާއުގައި"ގެ ނަމުގައި އެމްޑީޕީން ސިލްސިލާކޮށް ބާއްވާ ޖަލްސާގައި ވާހަކަދައްކަމުން ފައިސަލް ވިދާޅުވީ ފެންނަނީ އެތައް ބައެއްގެ ގުރުބާނީއާއި މިންނެތް މަސައްކަތުން ގެނައި ގާނޫނުއަސާސީ ބާބަކަށް ފަހު ބާބަކުން، މާއްދާއަކަށް ފަހު މާއްދާއަކުން ގެއްލިގެން ގޮސް 2004ގެ ކުރިން ރާއްޖޭގެ ހިންގުމުގެ ނިޒާމު އޮތް ގޮތަށް ފުރޮޅިގެންދާ މަންޒަރު ކަމަށެވެ.
ފެހި ގާނޫނު އަސާސީ ހޯދާފައިވަނީ ވަރަށް ރަނގަޅު މަގުސަދެއްގައި ކަމަށާއި، އެގާނޫނު އަސާސީ ގެނައުމަށް މުޅި ރާއްޖޭގެ ރައްޔިތުން ބުރަ މަސައްކަތްތަކެއް ކުރި ކަން ފާހަގަކުރައްވަމުން ފައިސަލް ވިދާޅުވީ ގާނޫނުއަސާސީ ހޯދަން ޖެހުނީ މުހިންމު ބޭނުމެއްގައި ކަމަށެވެ. އެގޮތުން ތިންބާރު ވަކިވެފަ އޮތް ނިޒާމަކާއި، މިނިވަން މުއައްސަސާތަކެއްގެ އިތުރުން ރިޔާސީ ނިޒާމެއް ކަނޑައެޅުމަށްޓަކައިކަން ފައިސަލް ވިދާޅުވިއެވެ.
ގާނޫނު އަސާސީއަށް މި ފަހުން ގެނައި މެންބަރުން ޕާޓީން ވަކިވެއްޖެ ނަމަ ނުވަތަ ވަކިކޮށްފި ނަމަ މެންބަރުކަން ގެއްލޭ އިސްލާހާއި ގުޅޭގޮތުން ފައިސަލް ވިދާޅުވީ ރައްޔިތުންގެ މަޖިލީހަކީ ރައްޔިތުން އިންތިހާބުކުރާ، ރައްޔިތުންގެ ކަންކަމުގައި ވަކާލާތުކުރަން މެންބަރުން ތިބޭ ތަނެއް ކަމަށާއި ނަމަވެސް އެ ގެނައި ބަދަލުތަކުން މެންބަރުންނަށް ލިބޭ ބާރުތައް ގެއްލިއްޖެކަމަށެވެ.
މީގެ އިތުރުން ފައިސަލް ވިދާޅުވީ ގާނޫނު އަސާސީން ރައްޔިތުންނަށް ލިބިފައިވާ ހައްގުތައް ގެއްލިގެންދާން އެއްވެސް ރައްޔިތެއް ބޭނުންނުވާނެ ކަމަށެވެ. އެހެން ނަމަވެސް ފަހަރަކު ހައްގެއް ހަނިވެ، ގެއްލެމުންދާ ކަމަށާއި އެހެންކަމުން ގާނޫނު އަސާސީގެ ދިފާއުގައި ނުކުތުމަށް ފައިސަލް ވަނީ ގޮވާލައްވާފައެވެ.
