މުޅި އައްޑޫ ސިޓީގެ ހުރިހާ އަވަށެއްގެ ސީސީޓީވީ ކެމެރާތައް ބެލޭގޮތަށް ފުލުހުންގެ ދެކުނުގެ ކޮމިއުނިކޭޝަން އެންޑް ކޯޑިނޭޝަން ސެންޓަރު ހުޅުވައިފިއެވެ.
ނޭޝަނަލް ކޮލެޖް އޮފް ޕޮލިސިންގް އެންޑް ލޯ އެންފޯސްމަންޓުގައި ބޭއްވި ރަސްމިއްޔާތެއްގައި މި ސެންޓަރު ހުޅުއްވައި ދެއްވީ ކޮމިޝަނާ އޮފް ޕޮލިސް އަލީ ޝުޖާއުއެވެ.
ފުލުހުން ބުނީ ދެކުނުގެ ސަރަހައްދުގެ ކޮމިއުނިކޭޝަން އެންޑް ކޯޑިނޭޝަން ސެންޓަރަކީ ފުލުހުންގެ ސައުތު ރީޖަން ކޮމާންޑުގައި ހިމެނޭ ގއ. ގދ އަތޮޅު އިތުރުން ފުވައްމުލަކު ސިޓީ އަދި އައްޑޫ ސިޓީގެ ފުލުހުންގެ ހިދުމަތަށް ހާއްސަ ކޮށްގެން ގާއިމް ކުރެވިފައިވާ ސެންޓަރެެއް ކަމަށެވެ. އެގޮތުން މި ސެންޓަރު ގާއިމްވެގެން ދިއުމާއެކު މި ސަރަހައްދުގެ ރައްޔިތުންނަށް ފުލުހުންގެ ހިދުމަތް ހޯދުމަށާއި، މައުލޫމާތު ސާފުކޮށް ފުލުހުންނަށް ދޭން ބޭނުންވާ މައުލޫމާތު ފޯރުކޮށްދިނުމުގައި ފަސޭހަ ވެގެންދާނެ ކަމަށް ފުލުހުން ވަނީ ބުނެފައެވެ.
މީގެ އިތުރުން ފުލުހުން ބުނީ ސައުތު ޕޮލިސް ރީޖަންގައި ހިމެނޭ ހުރިހާ ރަށެއްގެ ފުލުހުންގެ ހިދުމަތް ގުޅުވާލުމުގެ އިތުރުން، މި ސެންޓަރުން އައްޑޫ ސިޓީގައި މިހާރު ގާއިމްކޮށްފައިވާ ސީސީޓީ ކެމެރާތައް މޮނިޓާ ކުރެވޭނެކަމަށެވެ. އެގޮތުން އައްޑޫގެ ގުޅިފައިވާ ރަށްތަކުގެ އިތުރުން ވަކިން އޮންނަ ހުޅުދޫ އާއި މީދޫގައި ގާއިމް ކޮށްފައިވާ ކެމެރާތައް މިސެންޓަރު މެދުވެރިކޮށް ބަލާލެވޭނެ ކަމަށް ފުލުހުން ވަނީ ބުނެފައެވެ.
ދެކުނުގެ ކޮމިއުނިކޭޝަން އެންޑް ކޯޑިނޭޝަން ސެންޓަރާއެކު އައްޑޫގައި ގާއިމްކުރެވިފައިވާ 300 އަށްވުރެ ގިނަ ސީސީޓީވީ ކެމެރާ، މެދުވެރިކޮށް މުޅި އައްޑޫސިޓީ 24 ގަޑިއިރު ބެލެހެއްޓޭނެއެވެ. މާލެ ސަރަހައްދުން ބޭރުގައި ގާއިމްކުރެވިގެން ދިޔަ ފުރަތަމަ ކޯޑިނޭޝަން ސެންޓަރުގެ ސަބަބުން ފުލުހުން ރައްޔިތުންނަށް ދޭ ހިދުމަތް އަވަސްވެގެންދާނެއެވެ.
