ފިރިހެން ފުލުހަކު އަންހެނެއްގެ ގަޔަތް އަތްލާ ކޮއްޕާލި މައްސަލައެއް އެ އިދާރާއިން ބަލަން ފަށައިފިއެވެ.
ސޯޝަލް މީޑިއާގެ އެކި މަންސަތަކުގައި އާންމު ވެފައިވާ ވީޑިއޯއިން ފެންނަ ގޮތުގައި ތިން ފުލުހުން ވެގެން ފިރިހެނަކު ހައްޔަރު ކުރުމަށް މަސައްކަތް ކުރިއިރު އެތާ ކައިރި ހުރި ދެ އަންހެނުންގެ ތެރެއިން އެއް އަންހެނަކު ކައިރިވާން މަސައްކަތް ކުރުމުން އެތާ ހުރި ފުލުހަކު އެ އަންހެން މީހާ ގައިގައި އަތްލާ ކޮއްޕާލާތަން ފެނިގެން ދެއެވެ.
އަދި އެ ފުލުސް މީހާ ވަރަށް ބާރަށް ދުރަށް ޖެހޭށޭ ބުނާ އަޑުވެސް ވީޑިއޯއިން އިވިގެން ދެއެވެ.
އެއާއެކު ފިރިހެން ފުލުހުން އަންހެނުން ހައްޔަރުކުރުމުގެ ބަހުސް އަނެއްކާ ވެސް ފެށިފައިވާ މި ދަނޑިވަޅުގައި ފުލުހުން 'ދަ ޕްރެސް' އަށް ބުނީ، ފުލުހުންގެ ޕްރޮފެޝަނަލް ސްޓޭންޑާޑްސް އިން އެ މައްސަލަ ތަހުގީގު ކުރަމުންދާ ކަމަށެވެ.
މީގެ ކުރިންވެސް ވަނީ ފިރިހެން ފުލުހުންތަކެއް، މުޒާހަރާއެއްގެ އަންހެން ބައިވެރިންތަކެއް ހައްޔަރުކުރަން ގަޔަށް އަތްލި މައްސަލަ އެއް ފެންމަތިވެ އެކަމާ އާންމުން ކަންބޮޑުވުން ފާޅުކޮށްފައެވެ.
ރާއްޖޭގެ ސަގާފަތާއި އާދަކާދަ އަދި ދީނީ ގޮތުން ވެސް ފިރިހެނަކު އަންހެނަކު ގައިގައި އަތްލުމަކީ އާންމުކޮށް ބަލައިގަންނަ ކަމެއް ނޫނެވެ. އެކަމާ ކަންބޮޑުވުން ފާޅުކޮށް އިދިކޮޅު ފަރާތްތަކުން ވެސް ވަނީ އެ މައްސަލަ ބެލުމަށް އެދި ގޮވާލާފައެވެ.
