އެކިއެކި އިންތިހާބުތަކާއި ދިމާކޮށް އަދި ސިޔާސީ ވިސްނުމުގައި ނިމިދިޔަ ސަރުކާރުން ގިނަ ކުށްވެރިންތަކެއް ދޫކޮށްލާފައިވާ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސް މުއިއްޒު މިފަދައިން ވިދާޅުވީ އަތޮޅުތެެރެއަށް ކުރައްވާ ދަތުރުފުޅުގެ ތެރެއިން އއ. ތޮއްޑޫއަށް ވަޑައިގެން އެ ރަށުގެ ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައެވެ.
ރައީސް ވިދާޅުވީ އެމަނިކުފާނު މަސައްކަތް ކުރައްވަމުން ދަނީ ގައުމީ ވިސްނުމެއްގައި ތަފާތުކުރުމެއް ނެތި ރައްޔިތުންނަށް ހިދުމަތްދެއްވުމަށް ކަމަށެވެ. އެހެންނަމަވެސް މީގެކުރިން ފެނިގެން ގޮސްފައި ވަނީ ޖަލުތަކުގައި ތިބޭ ކުށްވެރިން އެއްވެސް ވަރެއްގެ ރިހެބްލިޓޭޝަންއަކަށް ނުގޮސް މަގުމައްޗަށް ދޫކޮށްލާތަން ކަމަށާއި އޭގެ ސަބަބުން ވަރަށް ގިނަ ނުރަނގަޅު ކަންކަން ކުރިމަތިވެގެންދާކަން ރައީސް ފާހަގަކުރެއްވިއެވެ.
މި ސަރުކާރުން މިހާތަނަށް ލުއި ދޫ ނުވަތަ ދޫކޮށްލާފައި ވަނީ ޖުމްލަ 86 މީހުން ކަމަށް ރައީސް ވިދާޅުވިއެވެ. އެއާހިލާފަށް ނިމިދިޔަ ސަރުކާރުން 2023 ވަނަ އަހަރުގެ ރިޔާސީ އިންތިހާބާ ދިމާކޮށް 429 މީހުން، 2022 ގައި 256 މީހުން، 2021ގައި ލޯކަލް ކައުންސިލް އިންތިހާބާ ދިމާކޮށް 458 މީހުން ދޫކޮށްލާފައިވާ ކަމަށް ރައީސް ވަނީ ވިދާޅުވެފައެވެ.
މި އަހަރު ރައްޔިތުންގެ މަޖިލިސް އިންތިހާބު އޮތްކަން ފާހަގަކުރައްވާ ރައީސް ވިދާޅުވީ އިންތިހާބާ ދިމާކޮށް ސިޔާސީ ވިސްނުމެއްގައި މި ސަރުކާރުން ބަޔަކު މަގުމައްޗަށް ދޫކޮށްލާފައި ނުވާނެ ކަމަށެވެ. ނަމަވެސް 2019ގެ މަޖިލިސް އިންތިހާބަ ދިމާކޮށް ވެސް 762 މީހުން ދޫކޮށްލާފައިވާކަން ރައީސް ފާހަގަ ކުރެއްވިއެވެ.
ރައީސް ވިދާޅުވީ މި ސަރުކާރުން ހިދުމަތް ދެނީ ސިޔާސީ ގޮތުން އަމިއްލަ ފައިދާއެއް ހޯދުމަށް ނޫން ކަމަށާއި ހިދުމަތް ދެނީ ގައުމަށް ރަނގަޅު އަދި ރައްޔިތުންނަށް ރަނގަޅު ގޮތަށް ވިސްނަވައިގެން ކަމަށެވެ. އެގޮތުން ޖަލުގައި ތިބޭ މީހުންނަށް ރިހެބްލިޓޭޓްވުމަށް ނުވަތަ މުޖުތަމައަށް ފައިދާ ހުރި ކަމެއް ކުރުމުގެ ޕްރޮގްރާމްތަކެއް ހިންގުމަށް ކެބިނެޓުން ނިންމާފައިވާކަން ރައީސް ފާހަގަކުރެއްވިއެވެ.
