ދިވެހި ވަތަނީ ހިދުމަތުގެ ތަމްރީނުތައް ފުރިހަމަކުރާ ޒުވާނުންނަށް ވަޒީފާގެ ފުރުސަތުތައް ފަހިކޮށްދިނުމަށް ކުރާ މަސައްކަތުގައި ނޭޝަނަލް ކެރިއާ ސާވިސްގެ ދައުރު ފުޅާކުރުމަކީ ސަރުކާރުގެ މުހިންމު އަމާޒެއް ކަމުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސުލްޖުމްހޫރިއްޔާ މިހެން ވިދާޅުވީ، ދިވެހި ޒުވާނުންގެ ކުރިމަގު ބައްޓަންކޮށް އުޖާލާކޮށްދިނުމުގެ އާ ރާސްތާއެއް ފަހިކޮށްދިނުމުގެ އަޒުމުގައި މިދިޔަ އަހަރުގެ އޮކްޓޯބަރު 1ގައި ސަރުކާރުން ފެށި "ދިވެހި ވަތަނީ ހިދުމަތް" ޕްރޮގްރާމަށް އެއް އަހަރު ފުރުމާ ގުޅިގެން ދެއްވި މެސެޖުގައެވެ.
މި މުނާސަބަތުގައި ރައީސް ވިދާޅުވީ، ވަތަނީ ހިދުމަތުގެ ކުރިމަގު ފެންނަނީ ވަރަށް އުޖާލާކޮށް ކަމަށެވެ. އެގޮތުން ކުރިއަށް އޮތް ތަނުގައި މި ހިދުމަތުގެ ތެރެއަށް އިތުރު ފަންނީ ދާއިރާތައް ތައާރަފުކޮށް، އިންޓާންޝިޕް ޕްރޮގްރާމްތައް ވެސް ފަށާނެ ކަމަށް އެމަނިކުފާނު ހާމަކުރެއްވިއެވެ.
ރައީސުލްޖުމްހޫރިއްޔާ ފާހަގަކުރެއްވި ގޮތުގައި، ކޮންމެ އަހަރަކު 1000 ޒުވާނުން ތަމްރީނު ކުރުމަށް ސަރުކާރުން ކަނޑައެޅި ލަނޑުދަނޑި ފުރަތަމަ އަހަރު ވެސް ވަނީ ކާމިޔާބުކަމާއެކު ހާސިލްކުރެވިފައެވެ. އެގޮތުން ފާއިތުވި އެއް އަހަރު ދުވަހުގެ ތެރޭގައި، ނޭޝަނަލް ސާވިސް އިނީޝަލް ޓްރޭނިންގެ ދަށުން 1028 ޒުވާނުން އަދި ނޭޝަނަލް ސާވިސް ސްކިލް ޓްރޭނިން ޕްރޮގްރާމުން 136 ޒުވާނުން ވަނީ ތަމްރީނު ފުރިހަމަކޮށްފައެވެ. އެހެންކަމުން މިއީ ޒުވާނުންނަށް ވަރަށް އުފެއްދުންތެރި މަސައްކަތްތަކެއް ކޮށްދެވުނު އަހަރެއް ކަމަށް އެމަނިކުފާނު ވިދާޅުވިއެވެ.
މި މުނާސަބާގައި ރައީސް ވަނީ ތަމްރީނުތައް ފުރިހަމަކުރި ހުރިހާ ޒުވާނުންނަށާއި އެ ފަރާތްތަކުގެ އާއިލާތަކަށް ތަހުނިޔާ ވިދާޅުވެ، މި ހަރަކާތް ކާމިޔާބުކަމާއެކު ހިންގުމުގައި ބައިވެރިވި އެންމެހައި ފަރާތްތަކަށް ޝުކުރު އަދާކުރައްވާފައެވެ.
