މާލޭގެ އާޓިފިޝަލް ބީޗު ސަރަހައްދުގައި ބިދޭސީންތަކެއް މިރޭ ހިންގި މާރާމާރީގެ މައްސަލަ ބަލައި އެ މީހުންނަށް ފިޔަވަޅު އަޅާނެ ކަމަށް އިމިގްރޭޝަން ކޮންޓްރޯލާ މުހައްމަދު ޝަމްއާން ވިދާޅުވެއްޖެއެވެ.
މިއަދު އިރުއޮއްސުނު ވަގުތު އާޓިފިޝަލް ބީޗުގައި ބިދޭސީން ތަކެއްގެ މެދުގައި ޒުވާބު ކޮށް މާރާމާރީ ހިންގާފައިވާ އިރު، އެމީހުން ތިބީ މަސްތުގެ ހާލަތުގައި ކަމަށް މަންޒަރު ދުށް މީހުން އަންނަނީ ބުނަމުންނެވެ. އަދި މި ހަމަނުޖެުން ހިންގާފައި ވަނީ އިންޑިއާ ބައެއްގެ މެދުގައި ކަމަށް ވެސް މައުލޫމާތު ލިބިފައި ވެއެވެ.
އެ ވަގުތު އެމީހުންގެ މެދުގައި ހަމަނުޖެހުން ހިނގި ވަގުތު އެ ސަރަހއްދުގައި ހުރި ކުޑަކުއްޖެއްގައި ގައިގާ ޖެހިފައިވާ ކަމަށް ވެސް މައުލޫމާތު ލިބެއެވެ. އެކަމުގައި އެ ކުއްޖާގެ ބެލެނިވެރިޔާ ވަނީ ފުލުހުންނަށް މައްސަލަ ހުށަހަލާފައެވެ. ނަމަވެސް އެ ސަރަހައްދަށް ފުލުހުން ދިޔަ އިރު ހަމަނުޖެހުން ހިންގި މީހުން ވަނީ އެ ސަރަހއްދުން ގޮސްފައެވެ.
ފުލުހުން މިކަމާ ގުޅިގެން ބުނެފައި ވަނީ، އާޓިފިޝަލް ބީޗުގައި މިއަދު މާރާމާރީއެއް ހިންގާފައިވާ ކަމުގެ ރިޕޯޓެއް ފުލުހުންނަށް ލިބިފައި ވަނީ މިރޭ، 6:50 ހާއިރު ކަމަށެވެ. އަދި މި މައްސަލައާ ގުޅިގެން އެއްވެސް މީހަކު ހައްޔަރު ނުކުރާ ކަމަށާއި މި މައްސަލަ ބަލަމުން އަންނަ ކަމަށެވެ.
މި ކަމާ ގުޅިގެން އެކްސްގައި ކުރެއްވި ޕޯސްޓެއްގައި ޝަމްއާން ވިދާޅުވެފައި ވަނީ، މިއަދުގެ އިރުއޮއްސުނު ވަގުތު އާޓިފިޝަލް ބީޗު ސަރަހައްދުގައި މާރާމާރީ ހިންގާ އާންމު މަސްލަހަތު ނަގާލުމުގައި ބައިވެރިވެފައިވާ ބިދޭސީންގެ މައްސަލަ ޓާސްކް ފޯހުން މިހާރު ބަލަމުންދާ ކަމަށެވެ. އަދި މިކަމުގަ ޝާމިލުވެފައިވާ ބިދޭސީންނަށް ފިޔަވަޅު އަޅާނެ ކަމުގެ ޔަގީންކަން ޝައްމާން ވަނީ ދެއްވާފައެވެ.
ރާއްޖޭގައި މަސައްކަތް ކުރާ ބިދޭސީންނަށް ބަންދު ދުވަހެއްގެ ގޮތުގައި ކޮންެ ހުކުރު ދުވަހެއް ހަމަޖއްސާފައި އޮންނަ އިރު، ހުކުރު ދުވަސް ދުވަހު ހިތްފަސޭހަ މައިޒާންތައް ފަދަ ސަރަހައްދުތަކުގައި ގިން އަދަދެއްގެ ބިދޭސީން އުޅޭ ކަން ފާހަގަ ކުރެވެއެވެ. މި މާރާމާރީއާ ގުޅިގެން ސޯޝަލް މީޑިއާގައި ދައުރުވަމުން އަންނަ ވީޑިއޯ އިން ފެންނަ މަންޒަރަށް ބަލާއިރު އެ ވަގުތު އެ ސަރަހައްދުގައި ގިނަ އަދަދެއްގެ މީހުން އެއްވެފައި ވެއެވެ. އޭގެތެރޭގައި ކުޑަކުދިން ވެސް ތިބިކަން ފާހަގަކޮށް ލެވެއެވެ.
