ރާއްޖޭގައި މުޅިން އަލަށް "މަޑް ކްރެބް ފެޓަނިންގް" ނުވަތަ ޗަސްބިންތަކުގައި އުޅޭ ކުދި ކަކުނި ފަލަކުރުމުގެ ޕައިލެޓް މަޝްރޫއެއް ހިންގުމުގެ ހުއްދަ ދީފިއެވެ.
އެގްރިކަލްޗާ މިނިސްޓްރީން، މި ހުއްދަ ދޫކޮށްފައިވަނީ މެރިޓޯލް ޕްރައިވެޓް ލިމިޓެޑް ނަމަކަށް ކިޔާ އަމިއްލަ ކުންފުންޏަކަށެވެ. މި މަޝްރޫއު ކުރިއަށް ގެންދިއުމަށް ހަމަޖެހިފައިވަނީ ގދ. ފިޔޯރީގައެވެ.
މި މަޝްރޫއުގެ މައިގަނޑު މަގްސަދަކީ ފިޔޯރީގެ "ކުޅިޔެ ވަޅަގަނޑޭ" ކުޅިން ނަގާ ކުދި ކަކުނި، ހާއްސަ ކޮށިތަކެއްގައި ބަލަހައްޓައިގެން ފަލަކޮށް، ވިޔަފާރި އުސޫލުން ބާޒާރަށް ނެރެވޭނެ ފެންވަރަށް ތަރައްގީކުރުން ކަމަށް ވެއެވެ. މިކަމުގެ ސަބަބުން ކުޅީގެ ގުދުރަތީ ވަސީލަތްތަކަށް ގެއްލުން ނުވާނެހެން، ދެމެހެއްޓެނިވި ގޮތެއްގައި ކަކުނީގެ ވިޔަފާރި ފުޅާކުރުމުގެ ފުރުސަތު ފަހިވެގެންދާނެ ކަމަށް އެގްރިކަލްޗާ މިނިސްޓްރީން ބުނެއެވެ.
މި ޕައިލެޓް ޕްރޮޖެކްޓަކީ ރާއްޖޭގެ ރަށްރަށުގައި ލިބެންހުރި ގުދުރަތީ ވަސީލަތްތައް ބޭނުންކޮށްގެން އައު ވިޔަފާރިތައް އުފެއްދުމަށާއި، އިގްތިސާދީ މަންފާ އިތުރުކުރުމަށް އެޅޭ މުހިންމު ފިޔަވަޅެކެވެ.
މެރިޓޯލް ޕްރައިވެޓް ލިމިޓެޑުން ކުރިއަށްގެންދާ މި މަސައްކަތް ކާމިޔާބުވެއްޖެނަމަ، މިއީ ރާއްޖޭގައި މެރިކަލްޗަރ ނުވަތަ ކަނޑުފަޅުގެ ދިރުންތައް އާލާކުރުމުގެ ދާއިރާއަށް ލިބިގެންދާނެ ބޮޑު ކުރިއެރުމެއް ކަމަށް ބެލެވެއެވެ.
