އާންމު ސިއްހަތަށް ގެއްލުންވާގޮތަށް ހުޅުމާލޭގައި ބިދޭސީން ދިރިއުޅެމުން ދިޔަ ދެ ތަނެއް ބަލާ ފާސްކޮށް 14 މީހަކު އިމިގްރޭޝަންގެ ބެލުމުގެ ދަށަށް ގެންގޮސްފިއެވެ.
އިމިގްރޭޝަނުން ބުނީ ޓާސްކުފޯހުން ރޭ ކުރިއަށްގެންދިއަ ރެއިޑު އޮޕަރޭޝަނެއްގައި އާންމު ސިއްހަތަށް ގެއްލުންވާގޮތަށް ހުޅުމާލޭގައި ބިދޭސީން ދިރިއުޅެމުންދާ 02 އެކޮމޮޑޭޝަން ބްލޮކެއް ބަލައި ފާސްކޮށްފައިވާ ކަމަށެވެ.
އެގޮތުން ފުރަތަމަ ބަލާފައިވާ ތަނުން ގަވާއިދާ ހިލާފަށް އުޅެމުންދިއަ ބިދޭސީ 09 ފިރިހެނުން ވަނީ އިމިގްރޭޝަންގެ ބެލުމުގެ ދަށަށް ގެންގޮސްފައެވެ. އަދި ދެވަނަ ތަނުން ބިދޭސީ 03 އަންހެނަކާއި 02 ފިރިހެނުން ވަނީ އިމިގްރޭޝަންގެ ބެލުމުގެ ދަށަށް ގެންގޮސްފައިވާކަމަށެވެ.
އިމިގްރޭޝަނުން ހިއްސާކޮށްފައިވާ ފޮޓޯތަކަށް ބަލާލާއިރު، ބިދޭސީން ދިރިއުޅެމުން ދިޔައީ އެއްވެސް ސާފުތާހިރުކަމެއް ނެތް، ވަރަށް ކުޑަ ތަންކޮޅެއްގައިކަން ފާހަގަކުރެވެއެވެ. އަދި އެތަނުގެ ތެެރޭގައި ބިދޭސީން އިށީދެގެން ތިބި ތަނުގައި ތަރުފާލު އަޅާފައިވާއިރު، އެމީހުން ލާން ގެންގުޅޭ އަންނައުނުތައްވެސް ހާމަކަން ބޮޑު ގޮތެއްގައި އެތަން މިތަނުގައި އަޅުވާފައިވާ މަންޒަރު ފެނެއެވެ. މީގެ އިތުރުން ސިންކު ކައިރިއާ އި އެތަނުގައިވާ ފާހާނާގައި އެއްވެސް ސާފުތާހިރުކަމެއް ނެތް އިރު ފާރާއެކު މުޅި އެ ސަރަހައްދު ވަރަށް ބޮޑަށް ކަޅުކުލަ ވަނީ އަރާފައެވެ.
ރާއްޖޭގައި އުޅޭ ބިދޭސީން ދިރިއުޅެމުން އަންނަނީ، އާންމު ސިއްހީ ރައްކާތެރިކަމެއް ނެތް، އިންސާނުން ދިރިއުޅުމަށް އެކަށީގެންވާ ތަންތަނުގައި ނޫންކަމަށް ބުނެ މީގެ ކުރިންވެސް ގިނަ ބަޔަކު ވަނީ ކަންބޮޑުވުންފާޅުކޮށްފައެވެ. އަދި މީގެ ކުރިންވެސް ގިނަ އަދަދެއްގެ ބިދޭސީން އެއްތަނެއްގައި އުޅުމުގެ ސަބަބުން އިޖްތިމާއީ އަދި ސިއްހީ ގިނަ މައްސަލަތެއް ފެންމަތިވެފައިވާއިރު، މިފަދަ މައްސަލަތަކައް ކަމާއި ގުޅޭ އިދާރާތަކުން މާ ބޮޑު ސަމާލުކަމެއް ދީފައިނުވާކަމަށް ގިނަ ބަޔަކު ބުނެއެވެ. އެހެންނަމަވެސް މި ސަރުކާރުން ބިދޭސީންގެ މައްސަލަ ހައްލުކުރުމަށް ކުރަމުން އަންނަ މަސައްކަތުގެ ތެރެއިން ގަވައިދާ ހިލާފަށް އުޅެމުން އަންނަ ބިދޭސީން ހޯދުމުގެ އިތުރުން، ބިދޭސީންގެ މައުލޫމާތު އެއްކޮށް، އެމީހުން ދިރިއުޅެމުންދާ ތަންތަނާއި، މަސައްކަތްކުރާ މާހައުލު އިންސްޕެކްޓުކުރުމުގެ މަސައްކަތްވެސް އަންނަނީ ކުރަމުންނެވެ.
