ޑޮލަރުގެ ބަދަލުގައި ބްރިކްސްގެ އަމިއްލަ ފައިސާއެއް ބޭނުން ކުރަން ބްރެޒިލް އާއި ރަޝިއާގެ ވެރިން ހުށަހަޅާފައި ވަނިކޮށް، އެހެން ހަދައިފި ނަމަ ބްރިކްސްގެ ގައުމުތަކުން އެމެރިކާއަށް އެތެރެ ކުރާ ތަކެއްޗަށް 100 ޕަސެންޓް ޑިއުޓީ ނަގާނެ ކަމަށް އެމެރިކާގެ އާ ރައީސް ޑޮނާލްޑް ޓްރަމްޕް ވިދާޅުވެއްޖެއެވެ.
އަންނަ ޖެނުއަރީ މަހުގެ 20 ގައި މަގާމުގެ ހުވާ ކުރެއްވުމަށް ތައްޔާރުވެވަޑައިގަންނަވަމުން ގެންދަވާ ޓްރަމްޕްގެ މި އިންޒާރަށް ބްރިކްސް އިން އަދި ރައްދެއް ނުދެއެވެ.
ކުރިއަރަމުން އަންނަ އިގްތިސޯދުތަކާއި ކުރިއަރާފައިވާ ބައެއް އިގްތިސޯދުތައް ހިމެނޭހެން ބްރިކްސްގައި 9 ގައުމެއް ހިމެނެއެވެ. ދުނިޔޭގެ އާބާދީގެ 45 ޕަސެންޓް ހިއްސާ ކުރާ ސަރަހައްދުތައް ހިމެނޭގޮތަށް ބްރިކްސްގައި ހިމެނެނީ، ރަޝިއާ، ބްރެޒިލް، އިންޑިއާ، ޗައިނާ، ދެކުނު އެފްރިކާ، އީރާން، މިސްރު، އިތިއޯޕިއާ އާއި ޔޫއޭއީއެވެ.
ބްރިކްސްގައި ހިމެނޭ ގައުމުތަކަށް ބަލާއިރު އެއީ ދުނިޔޭގެ ވިޔަފާރީގެ ވެސް ބޮޑު ޕަސެންޓެއް ހިއްސާ ކުރާ ގައުމުތަކެވެ. އެގައުމުތަކުގައި ކުރާ ވިޔަފާރީގެ މުއާމަލާތްތަކުގައި ޑޮލަރުގެ ބަދަލުގައި ބްރިކްސް މަނީ ބޭނުން ކުރުމުގެ ހިޔާލު އުފަންކޮށް ފައިސާއެއްގެ ޑިޒައިންވެސް ވަނީ އާންމުކޮށްފައެވެ. ނަމަވެސް އެ ފައިސާ ރަސްމީ ކުރުމާމެދު ބްރިކްސްގެ ގައުމުތަކުގެ މެދުގައި ހިޔާލުތަފާތުވެފައި ވާތީ އެ ފައިސާ އަދި ރަސްމީ ކުރެވޭ ގޮތެއް ނުވެއެވެ.
ދުނިޔޭގެ އިގްތިސޯދީ އެންމެ ވަރުގަދަ 2 ބާރު ކަމަށްވާ އެމެރިކާ އާއި ޗައިނާ އާ ދެމެދު ވިޔަފާރީގެ ރޮނގުން ވާދަވެރިކަން ހިނގަމުން ދާ އިރު، ޓްރަމްޕް ވަނީ ޗައިނާގެ އިމްޕޯޓުން ޓެރިފް ބޮޑުކުރައްވާނެކަން މިހާރުވެސް އިއުލާން ކުރައްވާފައެވެ. އެގޮތުން ބައެއް އެއްޗެހިން 100 ޕަސެންޓް އަނެއްބައި އެއްޗެހިން 50 ޕަސެންޓާ ހަމައަށް ބޮޑުކުރައްވާނެ ކަމަށް ވަނީ ވިދާޅުވެފައެވެ.
އެއްގައުމުން އަނެއް ގައުމަށް އެތެރެ ކުރާ މުދަލަށް ބޮޑެތި އަދަދުތަކުން ޑިއުޓީ ނަގަން ފެށުމުން އާންމު ބާޒާރުގައި އެ މުދާ ގަނެ ވިއްކާ ފަރާތްތަކަށް އަގުބޮޑުވެ އެ މުދަލެއްގެ ޑިމާންޑް ގެއްލެއެވެ. އެހެންކަމުން ބްރިކްސްގެ ގައުމުތަކަށް އަޅާނެކަމަށް ޓްރަމްޕް އިންޒާރު ދެއްވި ފިޔަވަޅަކީ އެ ބްލޮކްގައި ހިމެނޭ ގައުމުތަކަށް ނުބައި ސިގްނަލެކެވެ.
