ސިއްހީ ހާލުކޮޅު ހުރި ގޮތުން މަގާމުގެ ޒިންމާ އަދާކުރެއްވުމަށް އުޒުރުވެރިވެ ވަޑައިގަންނަވާތީ އެގްރިކަލްޗާ މިނިސްޓަރު ޑރ. އައިޝަތު ރަމީލާ އިސްތިއުފާ ދެއްވުމާ ގުޅިގެން އެ މިނިސްޓްރީ ހިންގުން ވަގުތީ ގޮތުން ހަޔާ އެޑިއުކޭޝަން މިނިސްޓަރު ޑރ. މަރިޔަމް މާރިޔާއާ ހަވާލުކޮށްފިއެވެ.
ރައީސް އޮފީހުން ބުނީ އެގްރިކަލްޗާ މިނިސްޓަރުގެ މަގާމުން ރަމްލާ އިސްތިއުފާ ދެއްވުމާއެކު އެ މަގާމަށް އިތުރު ފަރާތެއް އައްޔަން ކުރެވެންދެން އެގްރިކަލްޗާ މިނިސްޓްރީގެ ހިންގުން ވަގުތީ ގޮތުން ހަޔާ އެޑިއުކޭޝަން މިނިސްޓަރު ޑރ. މަރިޔަމް މާރިޔާއާ ރައީސް ޑރ. މުހައްމަދު މުއިއްޒު ހަވާލު ކުރައްވާފައި ވާކަމަށެވެ.
މިނިސްޓާ އޮފް އެގްރިކަލްޗާ އެންޑް އެނިމަލް ވެލްފެއާގެ މަގާމަށް، ރައީސުލްޖުމްހޫރިއްޔާ ރަމީލާ އައްޔަން ކުރެއްވީ މިދިޔަ އަހަރުގެ ނޮވެމްބަރު މަހުގެ 17 ވަނަ ދުވަހުއެވެ. ރަމީލާ އަކީ ކެންސަރުގެ އާލާސްކަންފުޅަށް ފަރުވާ ހޯއްދަވަމުން ގެންދަވާ ބޭފުޅެކެވެ.
ރަމީލާގެ އިސްތިއުފާ ގަބޫލު ކުރައްވައި ރައީސް ވަނީ އާލާސްކަންފުޅުގައި އުޅުއްވަމުންވެސް، މަގާމުގެ ހައިސިއްޔަތުން، ރާއްޖޭގެ ގާނޫނީ ވެރިކަން ކުރިއަރުވައި، އެންމެހައި ރައްޔިތުންނަށް ލާބައާއި ފާގަތިކަން ހޯދައިދެނިވިމަގުން މި ދައުލަތުގެ ކަންތައްތައް ރަނގަޅަށް ހިންގުމުގައި އެހީތެރިވުމަށް ދެއްވި އެއްބާރުލެއްވުމަށާއި، ތެދުވެރިކަމާއި ވިސްނުންތެރިކަމާއެކު، ސަރުކާރަށް ކޮށްދެއްވި އަގުހުރި ހިދުމަތްތަކަށްޓަކައި އިހްލާސްތެރިކަމާއެކު ޝުކުރު އަދާކުރައްވާފައެވެ.
އަދި ރަމީލާ ފަދަ ހީވާގި އަމާނާތްތެރި ގާބިލު ބޭފުޅަކު ވަޒީރުންގެ މަޖިލީހުގައި ހިމެނުމަކީ ލިބިވަޑައިގެންނެވި ވަރަށް ބޮޑު އުފަލެއް ކަމަށާއި ކުރިއަށް އޮތްތާނގައިވެސް އޭނާގެ ހިދުމަތް ދިވެހި ގައުމަށް ލިބޭނެކަން ޔަގީން ކުރައްވާ ކަމަށް ވިދާޅުވިއެވެ.
