ސިއްހީ މައްސަލައެއް ދިމާވާ އިރަށް ސިހުރު ހާހޫރަ ކަމަށް ނިންމާ، ރަށްފުށުގައި މީހުންގެ އަބުރަށް އަރައިގަތުމަކީ އާންމު ކަމެކެވެ.
ހއ. ކެލާގައިވެސް މިފަދަ ހާދިސާތައް ހިނގާ އިރު، ފުލުހުންނަށް ކުރި ރިޕޯޓަކާ ގުޅިގެން އިންޓެލިޖެންސް ލިބިގެންކަމަށް ބުނެ ފުލުހުން މިއަދު ވަނީ ކެލައަށް އަރާފައެވެ.
ކެލާގައި ހިންގި އޮޕަރޭޝަންގަައި 9 ތަނެއް ބަލައި ފާސްކުރި ކަމަށް ފުލުހުން ބުނެއެވެ.
'ދަ ޕްރެސް' އަށް މައުލޫމާތު ލިބުނު ގޮތުގައި އެ ރަށުގައި ސިއްހީ މައްސަލައެއް ދިމާވި މީހަކު ވަނީ ދާދި ފަހުން ރުގްޔާ ކޮށްފައެވެ. އެކަމުގައި އޭނާއަށް ދިމާވަމުން އައި އުނދަގޫތަކަކާ ގުޅިގެން އެއީ އޭނާއަށް ބަޔަކު ސިހުރު ހަދަނީ ކަމަށް ބުނެ އަޑުފެތުރިއެވެ. އަދި ފުލުހުންނަށް ހުށަހެޅި ލިސްޓެއްގައި ހިމެނޭ މީހުންގެ ގެތަކަށް މިއަދު ފުލުހުން ވަދެ، އެ ގެތަށް ބަލައި ފާސްކުރިއެވެ.
އެރަށުގެ ބަޔަކު ސިހުރު ހަދަނީ ކަމަށް ބުނާ މައްސަލައާ ގުޅިގެން އެ ރަށުގެ ކައުންސިލުން މައުލޫމާތު ދެމުން ބުނީ، މިއަދު މެންދުރުގެ ވަގުތެއްގައި ފުލުހުން ވަނީ އެ ރަށުގެ ގެތަކެއް ބަލައި ފާސްކޮށްފައި ކަމަށެވެ. އަދި ބައެއް ގެތަކުން ސިހުރާ ގުޅުން ހުރި ތަކެތި ފުލުހުންގެ ބެލުމުގެ ދަށަށް ގެންދިޔަ ކަމަަށް ބެލެވޭ ކަމަށާއި ބައެއް ގޭގޭގެ މީހުން ފުލުހުންގެ އިދާރާއަށް ހާޒިރުކޮށް މިއަދު ބަޔާން ނަގާފައިވާ ކަމަށް ވެސް ކައުންސިލުން ބުނެއެވެ.
ބައެއް ގެތަކުން ފުލުހުން ހޯދި ތަކެތި ގެންގޮސްފައި ވަނީ ކޮތަޅު ކޮތަޅުގައި ބަންދުކޮށްގެން ކަމަށް ބުނެއެވެ. އޭގައި ހުރީ ލިޔެކިޔުން ކަން ކަށަވަރު ނުވާ ކަމަށް ކައުންސިލުން ބުނެއެވެ.
މި ކަމާ ގުޅިގެން ފުލުހުން ބުނީ، ލިބިފައިވާ ޝަކުވާތަކަކާ ގުޅިގެން ހއ. ކެލާގެ 9 ތަނެއް ބަލައި ފާސްކޮށްފައިވާ ކަމަށެވެ. އަދި 5 މީހަކު ފުލުހުންގެ ބެލުމުގެ ދަށަށް ގެންގޮސް މިހާރު ދޫކޮށްލާފައިވާ ކަމަށެވެ. މި ޝަކުވާތަކާ ގުޅިގެން ބަލަން ޖެހޭ ކަންކަން ބަލަމުން އަންނަ ކަމަށް ވެސް ފުލުހުން ބުނެއެވެ.
ކެލާގެ އިތުރުން އަތޮޅުތެރޭގެ ރަށްރަށުގައި އެެކަކު އަނެކަކަށް ހަސަދަ ވެރިވެ އަދި އެކަކަށް ވުރެ އަނެކަކު ކުރިއަރާ ދާން ތުހުމަތުތައް ކޮށް، އަބުރު ގެއްލޭ ޒާތުގެ ކަންކަން ހިންގުމަކީ އާންމު ކަމެކެވެ.
މިއަދު ކެލައިން ފުލުހުން ވަން ބައެއް ތަންތަނުން އެއްވެސް ހެއްކެތް ފެނިފައި ނުވާ އިރު، ހެކި ނެތި މީހަކު ބުނާ އެއްޗެއްގެ މައްޗަށް އެފަދަ ތަންތަނަށް ފުލުހުން ވަން ސަބަބު އަދި ސާފެއް ނުވެއެވެ.
