ހަލިމަގުގައި ބާރު ސްޕީޑްގައި ގަވައިދާ ހިލާފަށް އޯވާ ޓޭކް ކުރި ސައިކަލެއް އެހެން ސައިކަލެއްގައި ޖެހި ހިނގި އެކްސިޑެންޓާއި ގުޅިގެން މިހަކު ހައްޔަރުކޮށްފިއެވެ.
މި މައްސަލައާ ގުޅިގެން ހައްޔަރު ކޮށްފައި ވަނީ ބ. އޭދަފުށި ފަސްމީރުގެ، ޝުނާން މުހައްމަދު (22އ)އެވެ.
ފުލުހުން ބުނީ މިދިޔަ ހުކުރު ދުވަހު ހިނގި މި އެކްސިޑެންޓުގައި ސައިކަލުގައި ތިބި ދެ މީހުންނަށް އަނިޔަވެ ހުޅުމާލެ ހޮސްޕިޓަލަށް ގެންގޮސްފައިވާ ކަމަށެވެ. މި އެކްސިޑެންޓުގައި އަނިޔާވި ފިރިހެން މީހާއަށް ފަރުވާ ދިނުމަށްފަހު ދޫކޮށްލާފައިވާއިރު އަންހެން މީހާއަށް ހޮސްޕިޓަލުގައި ފަރުވާ ދެމުން އަންނަކަމަށް ފުލުހުން ވަނީ ބުނެފައެވެ.
ފުލުހުން ބުނީ ގަވާއިދާ ހިލާފަށް އޯވާ ޓޭކްކޮށް އަދި އެކްސިޑެންޓްވުމުންވެސް މަޑުނުކޮށް ދިޔަ މައްސަލައިގައި ސައިކަލް ދުއްވަން އިން ޝުނާން ހައްޔަރުކޮށް، އޭނާގެ ބަންދާއި މެދު ގޮތެއް ނިންމުމަށް ކޯޓަށް ހާޒިރު ކުރުމުން އޭނާގެ ބަންދަށް ފަސް ދުވަހުގެ މުއްދަތެއް ޖަހާފައިވާ ކަމަށެވެ.
މި މައްސަލަ ފުލުހުން ގެންދަނީ ތަހުގީގު ކުރަމުންނެވެ.
