އިނގިރޭސިވިލާތަށް ކުރެއްވި 10 ދުވަހުގެ ނުރަސްމީ ދަތުރުފުޅު ނިންމަވާލައްވައި ރައީސް ޑރ. މުހައްމަދު މުއިއްޒުގެ ދެކަނބަލުން މިއަދު މާލެ ވަޑައިގެންފިއެވެ.
ރައީސްގެ ދެކަނބަލުން އިނގިރޭސިވިލާތަށް ނުރަސްމީ ދަތުރުފުޅެއްގައި ވަޑައިގަތީ މި މަހުގެ 20 ވަނަ ދުވަހުގައެވެ.
މުޅި ދަތުރުފުޅުގެ ހުރިހާ ހަރަދެއް ކުރައްވަނީ ރައީސް އަމިއްލަފުޅަށް ކަމަށް ފިޔަވައި، މި ދަތުރުފުޅަކީ އެމަނިކުފާނުގެ ރަސްމީ ދަތުރުފުޅަކަށް ނުވާތީ ރައީސް އޮފީހުން އިތުރު ތަފްސީލެއް ނުދެއެވެ.
ރައީސްގެ ދެކަނބަލުން ވަނީ މީގެކުރިން ތިން ފަހަރު ނުރަސްމީ ދަތުރުފުޅުތަކުގައި ސިންގަޕޫރަށް ވަޑައިގެންފައެވެ. އެގޮތުން މި އަހަރުގެ މާޗު މަހާއި މެއި މަހާއި އޮގަސްޓް މަހު ވެސް ސިންގަޕޫރަށް ވަޑައިގެންފައިވެއެވެ.
މީގެ އިތުރުން އެމަނިކުފާނުގެ ދެކަނބަލުން ވަނީ، ރައީސް މަގާމުގެ ހުވާކުރެއްވުމުގެ ކުރިން ވެސް ސިންގަޕޫރަށް ވަޑައިގެންފައެވެ.
