އާއިލާބެހޭ ގާނޫނުގެ، ދަރިންނަށް ހަރަދު ހޯދައިދިނުމުގެ ގަވައިދަށް ބަދަލު ގެނައުމަށް ރައްޔިތުންގެ މަޖިލީހަށް ހުށަހަޅައިފި އެވެ.
ދަރިންގެ ހަރަދަށް ދޭ 2،000ރ. ބޮޑުކޮށްދިނުމަށް ގަވައިދަށް ގެންނަން ޖެހޭ އިސްލާހު ގެނައުމަށް ހުށަހެޅުއްވީ ގަލޮޅު އުތުރު ދާއިރާގެ އެމްޑީޕީގެ މެމްބަރު މުހައްމަދު އިބްރާހިމް (ކުޑޫ) އެވެ.
ރައްޔިތުންގެ މަޖިލީހުގެ ރައީސް އަބްދުއްރަހީމް އަށް ފޮނުއްވި ސިޓީގައި މުހައްމަދު އިބްރާހީމް ވަނީ ކުއްޖާގެ އުމުރުން 18 އަހަރު ފުރެންދެން އެ ކުއްޖާގެ ހަރަދަށާއި ކުއްޖާ ބެލުމުގެ ހަރަދަށް، އެއް ކުއްޖަކު ހުރި ނަމަ 2،000ރ. އަދި އެއް ކުއްޖަކަށް ވުރެ ގިނަ ކުދިން ތިބި ނަމަ އިތުރުވާ ކޮންމެ ކުއްޖަކަށް 1،000ރ. އަށް ވުރެ މަދު ނޫން އަދަދެއް ދޭންވާނެ ކަމަށް ކަނޑައަޅާފައިވާ ކަމަށް ވިދާޅުވެފައެވެ.
މީގެ އިތުރުން ކުއްޖާއަށް ހަރަދުގެ ގޮތުގައި ދޭ ފައިސާގެ އިތުރުން ކޮންމެ ދަރިއަކަށް އަހަރަކު ތިން ހެދުމާއި ކިޔަވައިދިނުމުގެ ހަރަދުގެ ގޮތުގައި އަހަަރަކު ދެ ޔުނިފޯމާއި އެއް ބޫޓާއި ފޮތް ލިސްޓާއި ކިޔެވުމަށް ބޭނުންވާ އެހެނިހެން ތަކެއްޗާއި ބޭސް ފަރުވާގެ ހަރަދު ވެސް ދޭން ޖެހޭ ކަމަށް ގަވާއިދުގައި މިހާރު ބަޔާންކޮށްފައިވައިވާކަމަށް މި ސިޓީގައި ވަނީ ފާހަގަކުރައްވާފައެވެ. އެ ހަރަދު ދިނުމުގައި ބަލަނީ ސަރުކާރުގެ ބޭސް ފަރުވާ ކޮށްދޭ މަރުކަޒުތަކުގެ ރޭޓަށް ކަމަށާއި އެކަމަކު ކުއްޖާގެ ހާލަތާއި ބައްޕަގެ ތަނަވަސްކަމުގެ މައްޗަށް ރިއާޔަތްކޮށް އިތުރު ހަރަދުތައް ވެސް ނެގިދާނެ ކަމަށް ގަވާއިދުގައި ބަޔާންކުރާ ކަމަށް އޭނާ ވިދާޅުވިއެވެ.
އިތުރަށް މުހައްމަދު އިބްރާހީމް ވަނީ ހިދުމަތްތަކާއި ތަކެތީގެ އަގު އިންތިހާ އަށް އުފުލިފައިވާއިރު ހަމައެކަނި މަހެއްގެ މައްޗަށް 2،000ރ. އަކީ ދަރީންގެ ހުރިހާ ހަރަދެއް ފުއްދޭ ވަރަށް ވުރެ މާ ބޮޑަށް ވެސް ކުޑަ އަދަދެއްކަން ފާހަގަކުރައްވާފައެވެ. އަދި ސްކޫލު ފީ އާއި ޓިއުޝަން ފީތަކަށް އެކަނިވެސް 2،000 ރުފިޔާއިން ނުފުދޭކަން ފާހަަގަކުރައްވަމުން އޭނާ ވިދާޅުވީ ކުޑަކުދިންނަށް ކާންދޭ ތަކެތީގެ އިތުރުން ނެޕީގެ ހަރަދުތަކަށް އެކަނި ބެލިޔަސް މި ފައިސާ އިން ނުފުދޭނެކަމަށެވެ.
މީގެ އިތުރުން މުހައްމަދު އިބްރާހީމް ވިދާޅުވީ ގަވައިދުގައި އެ އަދަދު ބަޔާންކޮށްފައި އޮންނާތީ ކޯޓުގެ ދިގު މަރުހަލާތަކަށް ފަހު ވެސް ލިބެނީ ހަމަ އެ އަދަދު ކަމަށެވެ. އަދި އޭގެ ސަބަބުން ރޫޅިފައިވާ އާއިލާތަކާއި އެކަނިވެރި މައިންނަށް އުނދަގޫތަކާ ކުރިމަތިލާންޖެހިފައިވާކަން އޭނާ ވަނި ފާހަގަކުރައްވާފައެވެ.
އެހެންކަމުން މިކަންކަމަށް ބެލުމަށްފަހު، މުހައްމަދު އިބްރާހީމް ވަނީ ރައްޔިތުންގެ މަޖިލީހުގެ ގަވާއިދު ކޮމިޓީ މެދުވެރިކޮށް، ސޯޝަލް އެންޑް ފެމިލީ ޑިވެލޮޕްމަންޓް މިނިސްޓްރީގެ ކަމާ ބެހޭ ބޭފުޅުންނާ ބައްދަލުކޮށް އެ ގަވާއިދަށް އިސްލާހީ ހެޔޮ ބަދަލުތަކެއް ގެނެވޭނެ ގޮތްތައް ފަހިކޮށްދިނުމަށް އެދިފައެވެ.
