އިލެކްޝަންސް ކޮމިޝަން (އީސީ)ގެ ނައިބު ރައީސް އަލީ ނަޝާތާއި އެ ކޮމިޝަންގެ މެންބަރުން މުހައްމަދު އާސިފް ވަކިކުރަން ފާސްކުރި ނަމަވެސް ޑރ. މުހައްމަދު ޒާހިރު ވަކިކުރަން ނުފެންނަ ކަމަށް މަޖިލީހުން ފާސްކޮށްފިއެވެ.
އެކަމަށްޓަކައި ރިޔާސަތުން މިއަދު ވޯޓަށް އެހުމުން ނަޝާތާއި އާސިފް ވަކިކުރަން ފެންނަ ކަމަށް 68 މެންބަރުން ވޯޓުދެއްވިއިރު ނުފެންނަ ކަމަށް 10 މެންބަރަކު ވޯޓުދެއްވިއެވެ. އަދި ޒާހިރު ވަކިކުރަން ވޯޓަށް އެހުމުން ވޯޓުގައި ބައިވެރިވި 70 މެންބަރުން ވެސް ވޯޓު ދެއްވީ ޒާހިރު ވަކިކުރަން ނުފެންނަ ކަމަށެވެ.
މި މަހުގެ 12 ވަނަ ދުވަހު މިނިވަން މުއައްސަސާތަކާ ބެހޭ ކޮމިޓީން ވަނީ، ނަޝާތާއި އާސިފާއި ޒާހިރު ވަކިކުރުމަށް ރައްޔިތުންގެ މަޖިލީހަށް ހުށަހަޅައިފައެވެ. އެގޮތުން މި ތިން ބޭފުޅުން ވަކިކުރުމަށް އެދި މިނިވަން މުއައްސަސާތަކާ ބެހޭ ކޮމިޓީގެ މުގައްރިރު ހުސައިން ރިޒާ ވަކިވަކިން ފޮނުއްވި ސިޓީތަކުގައިވާ ގޮތުން:
- ތިން މެންބަރުން އަމިއްލަ މަގްސަދެއް ހާސިލްކުރުމަށް މަސައްކަތްކުރި ކަމަށް ތުހުމަތުކުރައްވާފައިވޭ
- އަދި ކޮމިޓީ އަށް އެ މެންބަރުންގެ ޝަކުވާ ވެސް ލިބިފައިވޭ
ތިން މެންބަރުންގެ މައްޗަށް ވެސް މިނިވަން މުއައްސަސާތަކާ ބެހޭ ކޮމިޓީން ބޮޑެތި ތުހުމަތުތަކެއް ކޮށްފައިވެއެވެ.
އެގޮތުން ނަޝާތާއި ޒާހިރާއި އާސިފް، ވިޔަފާރިކުރާ ފަރާތަކާ ގުޅިގެން ކޮމިޝަނަށް ވަކި ވިޔަފާރި ކުންފުންޏެއް މެދުވެރިކޮށް ކޮމްޕިއުޓަރުތަކެއް ހޯދާފައިވާ ކަމަށާއި އެ ތިން މެންބަރުންނާ ގުޅުން އޮންނަ ވިޔަފާރިއަކުން ކޮމިޝަނަށް ބައެއް ތަކެތި ހޯދާފައިވާ ކަމާއި އެގޮތުން ކޮންމެ މުއާމަލާތަކުން ބޮޑެތި މަންފާ ހޯދަމުން ދިޔަ ކަމަށް ތުހުމަތުކޮށްފައިވެއެވެ.
ކޮމިޓީގެ ރިޕޯޓުގައިވާ ގޮތުން، ވަކި ސިޔާސީ ޕާޓީއެއް އުފެއްދުމަށް ސޮއިކުރި މެންބަރުންގެ ލިސްޓު ރައީސް އޮފީހުގައި މަސައްކަތްކުރި ކުރީގެ އިސްވެރިއަކަށް އެ ތިން މެންބަރުން ފޮނުވައި، އެ ޕާޓީ އުފެއްދުމަށް ހުރަސްއެޅުމަށް މަސައްކަތްކޮށްފައިވެއެވެ. އަދި ވަކި ޕާޓީއެއް އުވާލުމަށް ވަގު ފޯމް ހެދުމުގައި އަމަލީގޮތުން ތިން މެންބަރުން މަސައްކަތްކޮށް، އެ ޕާޓީއަށް 3،000 މެންބަރުން ހަމަވިޔަ ނުދިނުމަށް މަސައްކަތްކުރި ކަމަށް ވެސް ތުހުމަތުކޮށްފައިވެއެވެ.
މީގެ އިތުރުން، މީގެ އެއް އަހަރު ކުރިން ބޭއްވި ރިޔާސީ އިންތިހާބުގެ ރީރަޖިސްޓްރޭޝަންގައި މަކަރު ހަދައި އޮޅުވާލުމާއި، އިލެކްޝަންސް ކޮމިޝަންގެ ޑޭޓާބޭހުގައި ރައްކާކުރެވިފައިވާ އާންމުންގެ މައުލޫމާތު އާންމު ފަރާތްތަކަށް ވިއްކައި އެއިން މަންފާ، ތިން މެންބަރުން ހޯދަމުން ދިޔަ ކަމަށް ވެސް އެ ރިޕޯޓުގައި ފާހަގަކޮށްފައިވެއެވެ.
