އިލެކްޝަންސް ކޮމިޝަން (އީސީ)ގެ ނައިބު ރައީސް އަލީ ނަޝާތާއި އެ ކޮމިޝަންގެ މެންބަރުން ޑރ. މުހައްމަދު ޒާހިރާއި މުހައްމަދު އާސިފް ވަކިކުރަނީ ކޮރަޕްޝަނާއި މިދިޔަ ރިޔާސީ އިންތިހާބުގެ ރީރެޖިސްޓްރޭޝަންގައި މަކަރު ހަދައި އޮޅުވާލުމާއި އެ ކޮމިޝަންގެ ޑޭޓާބޭހުން މައުލޫމާތު ވިއްކުން ފަދަ ތުހުމަތުތަކެއްގައި ކަން، މަޖިލީހުގެ މިނިވަން މުއައްސަސާތަކާ ބެހޭ ކޮމިޓީގެ ރިޕޯޓުން ހާމަވެއްޖެއެވެ.
މިނިވަން މުއައްސަސާތަކާ ބެހޭ ކޮމިޓީން އިއްޔެ ވަނީ އެ ކޮމިޓީގެ ސިއްރު ބައްދަލުވުމެއްގައި ނަޝާތާއި ޒާހިރާއި އާސިފް ވަކިކުރަން ނިންމައި، މިއަދު އެ މައްސަލަ ނިންމި ގޮތް ތަޅުމަށް ހުށަހަޅައިފައެވެ.
ކޮމިޓީގެ ރިޕޯޓުގައިވާ ގޮތުން 19 ތުހުމަތެއް ތިން ބޭފުޅުންގެ މައްޗަށް ކޮށްފައި ވެއެވެ.
ކޮމިޓީން ތުހުމަތުކުރި ގޮތުގައި ނަޝާތާއި ޒާހިރާއި އާސިފް، ވިޔަފާރިކުރާ ފަރާތަކާ ގުޅިގެން ކޮމިޝަނަށް ވަކި ވިޔަފާރި ކުންފުންޏެއް މެދުވެރިކޮށް ކޮމްޕިއުޓަރުތަކެއް ހޯދާފައިވެއެވެ. މީގެ އިތުރުން މި ތިން މެންބަރުންނާ ގުޅުން އޮންނަ ވިޔަފާރިއަކުން ކޮމިޝަނަށް ބައެއް ތަކެތި ހޯދާފައިވާ ކަމާއި އެގޮތުން ކޮންމެ މުއާމަލާތަކުން ބޮޑެތި މަންފާ ހޯދަމުން ދިޔަ ކަމަށް ތުހުމަތުކޮށްފައިވެއެވެ.
ރިޕޯޓުގައިވާ ގޮތުން، ވަކި ސިޔާސީ ޕާޓީއެއް އުފެއްދުމަށް ސޮއިކުރި މެންބަރުންގެ ލިސްޓު ރައީސް އޮފީހުގައި މަސައްކަތްކުރި ކުރީގެ އިސްވެރިއަކަށް އެ ތިން މެންބަރުން ފޮނުވައި، އެ ޕާޓީ އުފެއްދުމަށް ހުރަސްއެޅުމަށް މަސައްކަތްކޮށްފައިވެއެވެ. އަދި ވަކި ޕާޓީއެއް އުވާލުމަށް ވަގު ފޯމް ހެދުމުގައި އަމަލީގޮތުން ތިން މެންބަރުން މަސައްކަތްކޮށް، އެ ޕާޓީއަށް 3،000 މެންބަރުން ހަމަވިޔަ ނުދިނުމަށް މަސައްކަތްކުރި ކަމަށް ވެސް ތުހުމަތުކޮށްފައިވެއެވެ.
މީގެ އިތުރުން، މީގެ އެއް އަހަރު ކުރިން ބޭއްވި ރިޔާސީ އިންތިހާބުގެ ރީރަޖިސްޓްރޭޝަންގައި މަކަރު ހަދައި އޮޅުވާލުމާއި، އިލެކްޝަންސް ކޮމިޝަންގެ ޑޭޓާބޭހުގައި ރައްކާކުރެވިފައިވާ އާންމުންގެ މައުލޫމާތު އާންމު ފަރާތްތަކަށް ވިއްކައި އެއިން މަންފާ، ތިން މެންބަރުން ހޯދަމުން ދިޔަ ކަމަށް ވެސް އެ ރިޕޯޓުގައި ފާހަގަކޮށްފައިވެއެވެ.
ނަޝާތަށާއި ޒާހިރަށާއި އާސިފަށް ކުރެވޭ އިތުރު ތުހުމަތުތައް:
- މުވައްޒަފުންނާ ބޭއަދަބީ ބަހުން ނަޝާތު މުއާމަލާތުކުރުން
- ކޮރަޕްޝަނާއި ވޯޓުވިއްކުމަކީ މައްސަލައެއް ނޫން ކަމަށް ބުނުން
- ނަޝާތު، ކޮމިޝަންގެ އިސް ބައެއް މުވައްޒަފުންނަށް އެކި މަންފާ ހޯދައިދިނުން
- ބައެއް މުވައްޒަފުންނާ ނަޝާތު ލޯބީގެ ގުޅުން ބޭއްވުން
- ބައެއް މުވައްޒަފުންނާ ޒާތީގޮތެއް ބަހައްޓައި އެ މުވައްޒަފުންގެ މަސައްކަތްތަކަށް ނަޝާތު ހުރަސްއެޅުން
- ވަކި ޕާޓީއަކަށް ރިޔާސީ އިންތިހާބު ކާމިޔާބުކޮށްދިނުމަށް މަސައްކަތްކޮށްފައިވުން
- ހާޒިރުވާ ދުވަސްދުވަހު ގަޑި ނުބައިކޮށް ޖަހައި ހާޒިރުނުވާ ދުވަސްދުވަހު ހާޒިރުވާކަމަށް ނޯޓުކޮށް، އެޗްއާރު ސިސްޓަމުން ބޭރުން ވަކި ފޮތެއް ނަޝާތު ބޭނުންކުރަމުން ދިއުން
- ކޮމިޝަންގެ މުވައްޒަފުންގެ މެދުގައި އޭރުގެ ރައީސް ފުވާދުގެ އަގުވައްޓާލުމަށް ފާޅުގައި ތިން މެންބަރުން މަސައްކަތްކުރުން
- ނަޝާތު، ސިޔާސީ އެކި ފަރާތްތަކާ މެދު ގާތް ގުޅުމެއް ބާއްވަމުން ދިޔަކަން
ކޮމިޓީން ނިންމާފައިވަނީ ކޮމިޓީއަށް ލިބުނު މައުލޫމާތުތަކަށް ބެލުމަށް ފަހު، ތިން މެންބަރުން ވެސް އީސީގެ މެންބަރުކަމުގެ މަގާމާ އެކަށީގެންނުވާ ފަދަ އަމަލުތަކެއް ކޮށްފައިވާ ކަމަށް ފެންނަ ކަމަށެވެ. އެހެންވެ ތިން މެންބަރުން ވަކިކުރަން ވެސް ކޮމިޓީން ވަނީ ނިންމައިފައެވެ.
