ހުޅުމާލޭ ފުރަތަމަ ފިޔަވަހީގައި މީހަކަށް ތޫނު އެއްޗަކުން ހަމަލާދޭން އުޅުނުކަމުގެ ތުހުމަތުގައި ހައްޔަރުކުރި މީހާ ޝަރީއަތް ނިމެންދެން ބަންދުކޮށްފިއެވެ.
މި މައްސަލައިގައި ފުލުހުން ހައްޔަރުކުރީ އދ. ދަނގެތި، ލިލީގެ، އުމުރުން 33 އަހަރުގެ ހުސެއިން ފާއިގު އެވެ.
ފުލުހުން ބުނީ ފާއިގު ހައްޔަރުކުރީ މި މަހުގެ 22 ވަނަ ދުވަހު ހުޅުމާލޭ ފުރަތަމަ ފިޔަވަހީގައި ތޫނު އެއްޗެއް ބޭނުން ކޮށްގެން މީހާކަށް ހަމަލާ ދޭން އުޅެނިކޮށް ކަމަށެވެ. އަދި އެ ވަގުތު ފާއިގު ހުއްޓުވަން މަސައްކަތްކުރު ފުލުހަކަށްވެސް ހަމަލާދީފައި ވާއިރު ފުލުހުން ބުނީ އޭނާގެ ބަންދާއި މެދު ގޮތެއް ނިންމުމަށް ކޯޓަށް ހާޒިރުކުރުމުން މި މައްސަލައިގެ ތަހުގީގު މަރުހަލާ ނިމެންދެން އޭނާ ބަންދުކުރުމަށް ކޯޓުން އަމުރުކޮށްފައިވާ ކަަމަށެވެ.
ފާއިގު ހައްޔަރުކޮށް ފުލުހުންގެ ބެލުމުގެ ދަށަށް ގެންދިއުމަށް މަސައްކަތް ކުރާ މަންޒަރު ފެންނަ ވީޑިއޯއެއް ސޯޝަލް މީޑިއާގައި ދައުރުވަމުން އަންނަ އިރު އެ ވީޑިއޯއިން ފެންނަނީ އޭނާގެ ދެއަތް ފަހަތަށް ލާ ބިޑި އަޅުވާފައިވާ ތަނެވެ. އަދި ބިޑި އަޅުވާފައި ހުރި ފާއިގުގެ ދެފަރާތުގައި ދެ ފުލުހުން އޭނާ ހިފަހައްޓައިގެން ވެހިކަލް އަށް އަރުވަން ތައްޔާރުވާ ތަން ފެނެއެވެ. އެވަގުތު އެމީހާ އޭނާ އަކީ ސިކުނޑި ހަމަނުޖެހޭ މީހެއް ކަމަށް ބުނާ އަޑު އިވެއެވެ.
މި މައްސަލަ ފުލުހުން ދަނީ އިތުރަށް ތަހުގީގު ކުރަމުންނެވެ.
