ރާއްޖެއަށް މިހާރު ކުރަމުންދާ ވިއްސާރައިގައި ނ. މާފަރުގައި ފެން ބޮޑުވެ 5 ގެއަކަށް ފެންވަދެ ގެއްލުންތަކެއް ވެއްޖެއެވެ.
ނޭޝަނަލް ޑިޒާސްޓާ މެނޭޖްމެންޓު އޮތޯރިޓީ (އެންޑީއެމްއޭ) އިން ބުނީ މާފަރުގައި ފެންބޮޑުވެ 5 ގެއަކަށް ފެންވަދެގެން ރިޕޯޓްކޮށްފައިވާކަމަށާއި، އޭގެ ތެރެއިން ގެއްލުންލިބުނު 1 ގެއެއްގެ މީހުން އެހެން ގެއަކަށް ބަދަލުކޮށްފައިވާކަމަށެވެ.
އެންޑީއެމްއޭ އިން ބުނީ ރަށު ކައުންސިލާއި، ފުލުހުން އަދި އެމްއެންޑީއެފްގެ އެހީތެރިކަމާއެކު ޕަންޕު ބޭނުންކޮށްގެން ރަށު ތެރެއިން ފެން ހިންދުމުގެ މަސައްކަތް މިހާރު ކުރަމުންދާކަމަށެވެ.
ރާއްޖެއަށް ކުރަމުންދާ ވިއްސާރައިގައި ޅ. ކުރެންދޫގެވެސް 104 ގެއަކަށް ފެންވަދެ ވަނީ ބޮޑެތި ގެއްލުންތަކެއް ވެފައެވެ. އެންޑީއެމްއޭ އިން ބުނީ މި މަހުގެ 18 ވަނަ ދުވަހު ބޯކޮށް ވާރޭ ވެހި ރަށުތެރޭ އެއްކޮށް ފެންބޮޑުވެފައިވާ ކަމަށާއި، ފެން ގަނޑު ހިންދާފައިވަނީ ޕަންޕު ބޭނުންކޮށްގެން އަދި ކޯރު ކަނޑައިގެން ކަމަށެވެ.
މީގެއިތުރުން ސ. ފޭދޫ، ދ. ބަނޑިދޫ އަދި ދ. ހުޅުދެލި އިންވެސް ވިއްސާރައިގައި ގެއްލުން ލިބިގެން ރިޕޯޓު ކޮށްފައިވާ ކަމަށް އެންޑީއެމްއޭ އިން ވަނީ ބުނެފައެވެ.
ފާހަގަކޮށްލެވޭ ގޮތުގައި ބޯކޮށް ވާރެ ވެހި ގަޑިއަކު 40 މޭލަށް ވައިގަދަވާނެ ކަމަށް ލަފާކޮށް މެޓް އޮފީހުން ވަނީ މިއަދު ހެނދުނު 7:00 އިން 11:00 އަށް ށ. އަތޮޅުން ފެށިގެން ބ. އަތޮޅަށް ރީނދޫ ސަމާލުވެސް ނެރެފައެވެ. މެޓް އޮފީހުން ވަނީ ކަނޑު ދަތުރު ކުރާ ފަރާތްތަކުން މޫސުމަށް ހާއްސަ ސަމާލުކަމެއް ދިނުމަށާއި މޫސުމާ ބެހޭ ފަހުގެ މައުލޫމާތު ހޯދާ ބެލުމަށް ފަހު ނޫނީ ދަތުރު ނުކުރުމަށް އިލްތިމާސްކޮށްފައެވެ.
