ޕީޕަލްސް ނެޝަނަލް ކޮންގްރެސް ޕާޓީ ކުރިޔަށް ދާނީ އެއް ލައްކަ މެންބަރުންނާއެކުގައި ކަަމށް އެ ޕާޓީގެ ޗެއާޕާސަން އަދި ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވެއްޖެއެވެ.
މިއަދު ކުރިއަށް ދާ ޕީއެންސީގެ އެތެރޭގެ އިންތިހާބުގައި ވޯޓުލާ ސަރަހައްދަށް ވަޑައިގެން މީޑިއާ އަށް މައުލޫމާތު ދެއްވަމުން އަބްދުއްރަހީމް ވިދާޅުވީ މިހާރު ޕީއެންސީގައި 97،000 ސައްހަ ފޯމު އެބަހުރި ކަމަށެވެ. އަދި ދަފްތަރުކުރެވިފައި 75،000 ފޯމު އެބަހުރިކަމަށް އަބްދުއްރަހީމް ވިދާޅުވިއެވެ.
އިލެކްޝަންސް ކޮމިޝަންގެ އޮންނަ ގަވާއިދެއްގެ ސަބަބުން ޕާޓީގެ ދަފްތަރަށް އިތުރުވަމުން ދަނީ ހަފްތާއަކު އެއްފަހަރުކަން ފާހަގަކުރައްވަމުން އަބްދުއްރަހީމް ވިދާޅުވީ އީސީން ޕާޓީގެ ދަފްތަރަށް ފޯމު އެންޓާ ކުރަނީ ޝަކުވާއަށް ހުޅުވާލުމަށްފަހު ހަފްތާއެއް ފަހުންކަމަށެވެ. މީގެ އިތުރުން އަބްދުއްރަހީމް ވިދާޅުވީ މިވަގުތު އެ ޕާޓީގައި 97،000 ފޯމް ހުރި ނަމަވެސް ޕާޓީ ކުރިޔަށް ދާނީ އެއް ލައްކަ މެންބަރުންނާއެކުގައި ކަމަށެވެ.
ޕީއެންސީއިން އެޕާޓީއަށް މެންބަރުން އިތުރުކުރުމުގެ ގޮތުން "ޕީއެންސީ މެންބާޝިޕް ޑްރައިވް" ގެ ނަމުގައި ޕާޓީއަށް ފޯމް ފުރުމުގެ ހަރަކާތްތަކެއް ކުރިއަށް ގެންދާއިރު، އީސީގެ ވެބްސައިޓުން ދައްކާގޮތުން ސެޕްޓެމްބަރު 19، 2024 ގެ ނިޔަލަށް އެ ޕާޓީގައި 28983 މެންބަރުން ރަޖިސްޓްރީވެފައިވެއެވެ.
