ގިޔާމަތް ދުވަހަކީ އަންނާނެ ދުވަހެއް ކަމަށާއި އެ ދުވަހަށް ހުރިހާ އެންމެން ވެސް ތައްޔާރު ވުމަށް މިއަދުގެ ހުކުރު ހުތުބާގައި ގޮވާލައިފިއެވެ.
އާހިރަތް ދުވަހަކީ ދުންޔަވީ ހަޔާތް ނިމޭ ދުވަސް ކަމަށާއި ﷲ ފިޔަވާ އެ ދުވަސް އަންނާނެ ދުވަހެއް އެނގޭ އެއްވެސް ފަރާތެއް ނުހުންނާނެ ކަމަށް ވެއެވެ. އެ ދުވަހު އުޑުތަކާއި ބިންގަނޑު ފަޅައިގެންގޮސް އިރުގެ އަލި ނެތިގެން ދާނެ ކަމަށާއި އެއީ، ފަންސާސް ހާސް އަހަރާ އެއްވަރުގެ ދިގު ދުވަހެއް ކަމަށް ވެއެވެ.
އެ ދުވަހުން އެއްވެސް ފަރާތަކަށް ނުފިލޭނެ ކަމަށާއި ކޮންމެ ތަނެއްގައި ކޮންމެ ގޮތަކަށް މީހަކު ދުނިޔެ ދޫކޮށްފައި ވިޔަސް އެކަލާނގެ އެމީހަކު މަހްޝަރުކުރައްވާނެ ކަމަށް ވެއެވެ. "ޖައްވުގައި ވިޔަސް، ފުން ބިންގަރާހެއްގެ އެންމެ އަޑީގައި ވިޔަސް، ވަލުޖަނަވާރެއްގެ ބަނޑުގައި ވިޔަސް، އަދި މި ނޫން ގޮތަކަށް ވިޔަސް، ގިޔާމަތްދުވަހު އެންމެން އެއްތަންކުރެއްވުމަކީ އެކަލާނގެއަށް ދާދި ފަސޭހަކަމެކެވެ." ހުތުބާގައި ބުންޏެވެ. އެ ދުވަހުން ހެޔޮ އަމަލުކޮށް އުޅުނު މީހާ އުފާ ކުރާނެ ކަމަށާއި މާތް ﷲގެ މަގުން މޫނު އެނބުރި މީހާ ހިތާމަ ކުރާނެ ކަމަށް ވެއެވެ.
ރަޙިމުގެ ގުޅުމަކުން ނުވަތަ ބައިބޮޑުކަމަކުން މަންފާއެއް ކުރާ ވަރަށްވުރެ ފިޔާމަތް ދުވަހުގެ ބިރުވެރިކަން މާ ބޮޑު ކަމަށާއި އެ މީހެއްގެ އެންމެ ލޯބިވާ މައިންބަފައިންނާއި، އަނބިދަރީންނާއި، އެއްބަނޑު އެއްބަފާ މީހުން، ގޮތް ހުސްވެފައިވާ ހާލުގައި ފެނުނަސް އެއްވެސް ފަރުވާލެއް ނުބަހައްޓާނެ ކަމަށް ވެއެވެ.
އެދުވަހުގެ ބިރުވެރި ކަމާއި ނާމާންކަން ބަޔާން ކުރަމުން ހުތުބާގައި އިތުރަށް ބުނީ، ގިޔާމަތް ދުވަސް ދިގުލައިގެން ދިޔުމުގެ ސަބަބުން މީސްތަކުންގެ ހާލު ބޮޑުވެ، ކަރުހިއްކުން އިންތިހާއަށް އިތުރުވެފައި ވަނިކޮށް މާތް ﷲ ގެ ރަޙުމަތުން އެކަލާނގެ ނަބިއްޔާ އަށް ހައުޟުކޮޅު ދެއްވާނެއެވެ. އޭގެ ފެން ކިރަށް ވުރެ ހުދުވާނެ ކަމަށެވެ. އަދި މާމުޔަށް ވުރެ ފޮނިވާނެއެވެ. އެއިން ފެންބުއިމުގެ ނަސީބު ލިބިގެންދާނީ މާތް ﷲ އަށް ފުރިހަމަ ގޮތުގައި އީމާންވެ، އެކަލާނގެއަށް އިޚްލާޞްތެރިކަމާ އެކު އަޅުކަންކޮށް، ނަބިއްޔާ އަށް ތަބާވާ މީހުންނަށް އެކަނި ކަމަށެވެ.
ގިޔާމަތް ދުވަހު ހިސާބު ބެއްލެވޭނެ ކަމަށާއި އެމީހެއް ކުޅަ އަމަލުތައް ވަޒަން ކުރެވޭނެ އެވެ. އެ ދުވަހުން ކަނާތަށް ފަތް ލިބޭނީ ހެޔޮ އަމަލުކޮށް އުޅުނު މީހުންނަށެވެ. އަދި އުރެދުނު މީހުންނަށް ފަތް ލިބޭނީ އެމީހެއްގެ ވާތަށެވެ. ނަމަވެސް އާޚިރަތް ހޯދުމަށް މަސައްކަތްކުރަނީ ވަރަށް މަދު ބަޔެއް ކަމަށާއި ދުންޔަވީ ހަޔާތް ހޯދުމުގެ ބަދަލުގައި އާހިރަތް ހޯދުމަށް މުޅި އުއްމަތަށް ވަނީ ނަސޭހަތްތެރިވެފައެވެ.
އެކަކު، އަނެކަކުގެ މައްޗަށް ދޮގުތައް ހަދައި ޣީބަބުނެ، އާޑަފުރައްސާރަކޮށް، އޭނާގެ އަބުރު ކަތިލާ މަންޒަރަކީ މުޖްތަމައުގައި އާންމު ކަމެއްކަން ފާހަގަކޮށް ހުތުބާގައި ވަނީ އެ ފަދަ ކަންކަމުން ދުރުހެލިވެ، ރައްކާތެރިވުމަށް ގޮވާލާފައެވެ.
