މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ އިސް މުވައްޒަފެއްގެ ޒާތީ މައުލޫމާތުތަކެއް ސޯޝަލް މީޑިޔާގައި ލީކުވި މައްސަލައެއް ބަލަމުން އަންނަ ކަމަށް ބުނެފިއެވެ.
އެމްއެމްއޭގެ އިސް މުވައްޒަފެއްގެ ވަޒީފާ އާ ބެހޭ ޒާތީ މައުލޫމާތުތަކެއް މި ހަފްތާގެ ތެރޭގައި ސޯޝަލް މީޑިޔާގައި ލީކުވެފައިވާ މައްސަލައާ ގުޅިގެން އެމްއެމްއޭ އިން ބުނީ، އެ ބޭންކްގެ އިންޓާނަލް އޮޑިޓުން އެ މައްސަލަ ބަލަމުން އަންނަ ކަމަށެވެ.
މިކަމާ ގުޅޭ ބައެއް ކަންކަމުގައި މޯލްޑިވްސް ޕޮލިސް ސާވިސްގެ ފަންނީ އެހީތެރިކަން ވެސް ހޯދާފައިވާ ކަމަށް އެމްއެމްއޭ އިން ބުނެއެވެ. މުވައްޒަފުންގެ ޒާތީ މައުލޫމާތަކީ އެ އޮތޯރިޓީން ރައްކާތެރިކުރަން ބޭނުންވާ މައުލޫމާތު ކަމަށް އެމްއެމްއޭ އިން ބުނެއެވެ.
ސޯޝަލް މީޑިއާގައި ސަރުކާރާއި ކުންފުނިތަކުގެ އިސް މަގާމުތަކުގައި ތިބޭ ފަރާތްތަކުގެ ޒާތީ މައުލޫމާތު އާންމު ކުރުމާއި އަދި ބައެއް ފަރާތްތަކާ ގުޅޭ ގޮތުން ދޮގު މައުލޫމާތު އާންމުކުރާ މައްސަލަތަކަކީ މިހާރު އާންމު ވަމުން އަންނަ މައްސަލަތަކެވެ.
