ދިވެހިރާއްޖެއަށް ދުންފަތް އެތެރެކުރުމާއި ރާއްޖެއިން ދުންފަތް ބޭރުކުރާ އަދި ދުންފަތުގެ ވިޔަފާރިކުރާ ފަރާތްތަކުން ލައިސަންސް ނަގަން ޖެހޭނީ ލައިސަންސް ނެގުމުގެ އުސޫލާއި އިޖުރާއަތުތައް ކަނޑައަޅާ ބަޔާންކުރާ ގަވާއިދު އާންމު ކުރުމުން ކަމަށް ހެލްތް މިނިސްޓްރީއިން ބުނެފިއެވެ.
ހެލްތް މިނިސްޓްރީއިން މިއަދު ނެރުނު ބަޔާނުގައި ބުނީ ދުންފަތް ކޮންޓްރޯލް ކުރުމާބެހޭ ގާނޫނަށް އިސްލާހު ގެނައުމުގެ ގާނޫނަށް މި މަހުގެ 15 އިން ފެށިގެން އަމަލުކުރަން ފެށުމާއެކު ދުންފަތުގެ ބާވަތްތައް ދިވެހިރާއްޖެއަށް އެތެރެކުރާ އަދި ދިވެހިރާއްޖެއިން ބޭރުކުރާ ކޮންމެ ފަރާތަކާއި ދުންފަތުގެ ބާވަތްތައް ގަނޑުކޮށް ނުވަތަ ވަކިވަކިން ރާއްޖޭގައި ވިއްކާ ކޮންމެ ފަރާތެއްގެ އަތުގައި ސަރުކާރުގެ ކަމާބެހޭ އިދާރާއިން ދޫކުރާ ސައްހަ ލައިސަންސެއް އޮންނަންވާނެ ކަމަށް ބަޔާންކޮށްފައިވާ ކަމަށެވެ.
އެގޮތުން އެ ގާނޫނާއި ގާނޫނުގެ ދަށުން ހަދާ ގަވާއިދުތަކާ ހިލާފަށް އެއްވެސް ފަރާތަކުން ދުންފަތް ނުވަތަ ދުންފަތުގެ އެއްވެސް ބާވަތެއް ދިވެހިރާއްޖެއަށް އެތެރެކޮށް ނުވަތަ ރާއްޖެއިން ބޭރުކޮށް ނުވަތަ ރާއްޖޭގައި ބަހައި ނުވަތަ ވިއްކައި ހަދައިގެން ނުވާނެ ކަމަށް ގާނޫނުގައި ބަޔާންކޮށްފައިވާކަން ވެސް ހެލްތް މިނިސްތްރީއިން ވަނީ ފާހަގަކޮށްފައެވެ.
ހެލްތް މިނިސްޓްރީއިން ބުނީ ގެ ގާނޫނުގައި އެހެން ބަޔާންކޮށްފައިވީ ނަމަވެސް ދުންފަތުގެ ވިޔަފާރި އަދި އެތަކެތި އިމްޕޯޓްކޮށް އެކްސްޕޯޓް ކުރުމުގެ ހުއްދަތައް ހޯދުން ލާޒިމްވާނީ އެ ގާނޫނުގައި ބަޔާންކުރާ ފަދައިން އެ ހުއްދަތައް (ލައިސަންސް) ދިނުމުގެ އުސޫލާއި އިޖުރާއަތުތައް ކަނޑައަޅާ ބަޔާންކުރާ ގަވާއިދު އާންމުކުރުމުން އެ ގަވާއިދުގައި ކަނޑައަޅާ މުއްދަތެއްގައި ކަމަށެވެ.
ދުންފަތް ކޮންޓްރޯލުކުރުމާބެހޭ ގާނޫނުއަށް ގެނައި އިސްލާހާއެކު އިލެކްޓްރޯނިކް ސިނގިރޭޓާއި ވޭޕްކުރުމަށް ބޭނުންކުރާ އެފަދަ އާލާތްތަކާއި އެ އެއްޗެއްސާއެކު ބޭނުންކުރުމަށް ތައްޔާރު ކޮށްފައިވާ އުފެއްދުންތައް ދިވެހިރާއްޖެއަށް އެތެރެކުރުމާއި، ވިއްކުމާއި، ހިލޭ ބެހުމާއި، އެ ތަކެތި ބޭނުންކުރުން އަންނަ ޑިސެމްބަރު މަހު 15އިން ފެށިގެން މަނާވާނެއެވެ.
އެކްސްޕޯޓް އިމްޕޯޓް ގާނޫނަށް ސަރުކާރުން ހުށަހެޅި އިސްލާހުތަކާއެކު ސިނގިރޭޓާއި ބިޑިންނާއި ހޫނުކޮށްގެން ބޭނުންކުރެވޭ ގޮތަށް ހުންނަ ދުންފަތުގެ އުފެއްދުންތަކުން ނަގާ އިމްޕޯޓް ޑިއުޓީ 25 ޕަސެންޓުން 50 ޕަސެންޓަށް އިތުރުކޮށް، ކޮންމެ ސިނގިރޭޓަކުންނާއި ބިޑިއަކުން ނަގާ 3 ރުފިޔާއިން 8 ރުފިޔާ އަށް ބޮޑުކުރުމަށް ވެސް ވަނީ ނިންމާފައެވެ.
