މާލެ ސަރަހައްދަށް ރަޖިސްޓްރީ ކުރި ވެހިކަލްތަކުގެ އަދަދު، އޭގެ ކުރީ އަހަރާ އަޅާބަލާއިރު މަދުވެފައިވާ ކަމަށް ޓްރާންސްޕޯޓު މިނިސްޓްރީން ބުނެފިއެވެ.
ޓްރާންސްޕޯޓު މިނިސްޓްރީން ބުނީ ގާނޫނާއި ގަވާއިދުގެ ތެރެއިން ނޫންގޮތަކަށް އެއްގަމު އުޅަނދު ރަޖިސްޓަރީކުރުން ނިމުމަކަށް ގެނެސްފައެވެ. މީގެ އިތުރުން، ގަރާޖުގެ ސައްހކަން ކަށަވަރުކުރުމުގެ މުހިންމު މަސައްކަތްވެސް ފަށާފައިވާކަމަށް މިނިސްޓްރީން ވަނީ ބުނެފައެވެ.
މީގެ އިތުުރުން ޓްރާންސްޕޯޓު މިނިސްޓްރީން ބުނީ މި މަސައްކަތުގެ މައިގަނޑު މަގަސަދަކީ ހަތަރު ފުރޮޅުލީ އުޅަނދު ރަޖިސްޓަރީ ކުރުމުގައި ގާނޫނާއި ގަވާއިދުގެ ތެރެއިން މިނިސްޓްރީގެ ޒިންމާ އަދާކުރުމަށާއި އަދި އުސޫލުން ބޭރުން ރަޖިސްޓަރީ ވަމުންދިޔަ ދިޔުން ނިމުމަކަށް ގެނައުން ކަމަށެވެ. މިނިސްޓްރީގެ ތަފާސްހިސާބުތަކުން ދައްކާގޮތުގައި، މި ގެނެވުނު ބަދަލުގެ ނަތީޖާއެއްގެ ގޮތުން 2023 ވަނަ އަހަރާ އަޅާބަލާއިރު 2024 ވަނަ އަހަރު އޮކްޓޯބަރު މަހާއި ހަމައަށް މާލޭ ސަރަހައްދަށް ރަޖިސްޓަރީ ކުރެވުނު ހަތަރު ފުރޮޅުލީ އުޅަނދު ރަޖިސްޓަރީކުރުމުގެ ނިސްބަތް 74.1 ޕަސެންޓް މިހާރު ދަށްވެފައިވާކަމަށް މިނިސްޓްރީން ވަނީ ބުނެފައެވެ.
މީގެ އިތުރުން އެ މިނިސްޓްރީން ބުނީ ދެފުރޮޅުލީ އުޅަނދު ރަޖިސްޓަރީކުރުމުގެ ނިސްބަތްވެސް 8.1 ޕަސެންޓް މަދުވެފައިވާކަމަށެވެ. މި ފިޔަވަޅުތަކުގެ ސަބަބުން މާލެ ސަރަހައްދަށް އެއްގަމު އުޅަނދު އިތުރުވަމުން ދިޔަ މިންވަރު ވަރަށް ބޮޑަށް ދަށްވެފައިވާކަން ފާހަގަކޮށް މިނިސްޓްރީން ބުނީ މި ފިޔަވަޅުތަކަކީ މާލޭގެ ޓްރެފިކް ހާލަތު ރަނގަޅުކުރުމަށް އެޅުނު މުހިންމު ފިޔަވަޅެއް ކަމުގައެވެ.
