މިހާތަނަށް، ގަވައިދާ ހިލާފަށް އުޅެމުންދިޔަ 5012 ބިދޭސީން ފޮނުވާލާފައި ވާކަމުގައި ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
ރޭ ސަރުކާރަށް އެއް އަހަރު ފުރުން ފާހަގަކުރުމަށް "ރައްޔިތުންނާއެކު ކުރިއަށް – ހަފުތާ 52" ނަމުގައި ކުރިއަށްދިޔަ ރަސްމިއްޔާތުގައި ވާހަކަފުޅު ދައްކަވަމުން ރައީސް ވިދާޅުވީ މި ސަރުކާރު ހަވާލުވިއިރު ގަވާއިދާ ހިލާފަށްއުޅޭ ބިދޭސީންގެ އަދަދު ނުވެސް އެނގޭކަމަށެވެ. އެހެންނަމަވެސް މިހާތަނަށް 5012 ބިދޭސީން ފޮނުވާލެވިފާކަން ހާމަކުރައްވަމުން ރައީސް ވިދާޅުވީ މިއީ ފާއިތުވި 3 އަހަރަށް ބަލާއިރުވެސް ގަވައިދާ ހިލާފަށް އުޅެމުން ދިޔަ ބިދޭސީން ބޭރުކުރެވިފައި ނުވާ މިންވަރެއް ކަމުގެވެ.
މީގެ އިތުރުން ރައީސް ވިދާޅުވީ ބިދޭސީންގެ މައްސަލައާއި ގޭންގު ކުއްތަކާއި މަސްތުވާތަކެތީގެ މައްސަލަތައް ހައްލުކުރުމަށް ކަމާގުޅޭ ހުރިހާ މުވައްސަސާއެއް އެއް ކުޑައެއްގެ ދަށަށް މިސަރުކާރުން ގެންނަވާފައިވާކަމަށެވެ. މީގެ އިތުރުންވެސް މުޖުތަމައުގެ ދެންވެސް ހުރި މައްސަލަތައް ހައްލުކުރުމަށް މި ސަރުކާރުން މަސައްކަތްކުރަމުން އަންނަކަން ފާހަގަކުރައްވަމުން ރައީސް ވިދާޅުވީ މި ސަރުކާރު ކުރިއަށްދާނީ ރައްޔިތުންގެ ހިޔާލާ މަޝްވަރާއާ އެއްކޮށްކަމަށެވެ. އަދި މި ސަރުކާރު އޮންނާނީ 100 އިންސައްތަ ރައްޔިތުންގެ ފަޅީގައިކަމަށް ރައީސް ވިދާޅުވިއެވެ.
މި ސަރުކާރުން، ބިދޭސީންގެ މައްސަލަ ހައްލުކުރުމަށް ގިނަ މަސައްކަތްތަކެއް ކުރަމުން އަންނައިރު، މީގެ ކުރިން ބޭއްވި ނޫސްވެރިންގެ ބައްދަލުވުމެއްގައި އިމިގްރޭޝަން ކޮންޓްރޯލާ މުހައްމަދު ޝައްމާން ވަހީދު ވަނީ އޮކްޓޫބަރު 21 ގެ ނިޔަލަށް 4361 ބިދޭސީން ޑީޕޯޓުކުރެވިފައިވާ ކަމަށާއި އަމާޒަކީ ނޮވެމްބަރު 17 ގެ ކުރިން 5000 ބިދޭސީން ޑީޕޯޓުކުރުން ކަމުގައި ވިދާޅުވެފައެވެ.
މި ސަރުކާރުގެ އަމާޒަކީ ގަވާއިދާ ހިލާފަށް އުޅޭ ބިދޭސީންގެ މައްސަލަ ތިން އަހަރު ތެރޭގައި ހައްލު ކުރުމެވެ.
