ކުރީގެ ރައީސް އިބްރާހިމް މުހައްމަދު ސޯލިހްގެ ވެރިކަމުގެ ފަހު ދުވަހު އެމަނިކުފާނުގެ ތަޖުރިބާގެ އަލީގައި ރައީސް ޑރ. މުހައްމަދު މުއިއްޒުއަށް ސިޓީއެއް ލިޔުއްވި ކަމަށް ވިދާޅުވެއްޖެއެވެ.
ރައީސް ސޯލިހް މިފަދައިން ވިދާޅުވީ ރާއްޖޭ ޓީވީގެ "ފަށާއިރު" ޕްރޮގްރާމްއަށް ދެއްވި އިންޓަވިއުއެއްގައެވެ.
ރައީސް ސޯލިހް ވިދާޅުވީ ހުރިހާ ކަމެއް ނިންމަވާލެއްވުމަށްފަހު، އެންމެ ފަހު ކަމެއްގެ ގޮތުން ކުރެއްވި ކަމަކީ އަލަށް އެ ގޮނޑީގައި އިށީނދެވަޑައިގަންނަވާ ރައީސުލްޖުމްހޫރިއްޔާއަށް ސިޓީއެއް ލިޔުއްވުން ކަމަށެވެ. އެއީ ވެރިކަމުގައި ހުންނަވައި ކަންކަން ކުރެއްވި އިރު ކުރިމަތިވި ދަތިތަކާއި އެ 5 އަހަރު ތެރޭގައި ކުރެވުނު ތަޖުރިބާގެ އަލީގައި ލިޔުއްވި ސިޓީއެއް ކަމަށް ރައީސް ސޯލިހް ވިދާޅުވިއެވެ.
ރައީސުލްޖުމްހޫރިއްޔާގެ މަގާމަކީ ވަރަށް ބޮޑު އަމާނާތެއް އަދި އެހާމެބޮޑު މަސްއޫލިއްޔަތެއްކަން ރައީސް ސޯލިހްގެ ސިޓީގައި ފާހަގަކޮށްފައިވެއެވެ. އަދި އަބަދުވެސް މަސައްކަތް ކުރަންވާނީ އެއްވެސް ރައްޔިތަކު ތަފާތުނުކޮށް އިހްލާސްތެރިކަމާއެކު ގައުމަށް ހިދުމަތް ކުރުމަށް ކަމަށް ވެސް އެމަނިކުފާނު ވިދާޅުވެފައިވެއެވެ
އެ ސިޓީގައި ރައީސް ސޯލިހް ވަނީ ކޮންމެ ކަމެއްގައި ވެސް އިސްލާމީ ދީނާ ގައުމީ މަސްލަހަތު އިސްކުރުމަށް ނަސޭހަތްތެރިވެވަޑައިގެންފައެވެ. އަދި އުނދަގޫ ކިތަންމެ ވަގުތަކާ ކުރިމަތިލާން ޖެހޭނެ ކަމާއި ތިމާ ބޭނުންވާ ގޮތަށް ކަަންކަން ނިންމަން ދަތިވާ ވަގުތުތަކުގައި ވެސް ރައްޔިތުންގެ ހައްގުތަކާ ގައުމީ މަސްލަހަތު އިސްކުރުމަށް ނަސޭހަތްތެރިވެވަޑައިގެންފައިވެއެވެ.
މީގެއިތުރުން ރައީސުލްޖުމްހޫރިއްޔާއަކީ ރައްޔިތުންގެ ހާދިމެއްކަން އަބަދު ވެސް ހަނދުމަފުޅުގައި ބެހެއްޓުމަށާއި މަޝްވަރާ ކުރެއްވުމަށް ވެސް އެމަނިކުފާނުގެ ސިޓީގައި އެދިވަޑައިގެންފައިވެއެވެ.
ރައީސް ސޯލިހް ވިދާޅުވީ އަތު ލިޔުމުން ލިޔުއްވި އެ ސިޓީއިން ކޮންމެވެސް ކަހަލަ އިބްރަތެއް ރައީސް މުއިއްޒުއަށް ލިބިވަޑައިގަންނަވާނެ ކަމަށް އުންމީދު ކުރެއްވެވި ކަމަށެވެ.
