ސަރުކާރުން ކޮންޓްރޯލް ކުރާ ކޮމިޝަނެއް އުފައްދައި މީޑިއާގެ މިނިވަންކަން ކަފުން ކުރުމަށް ހުށަހަޅާފައިވާ ބިލަށް ތާއީދު ނުކުރާނެ ކަމަށް އެމްޑީޕީ އިން ބުނެފިއެވެ.
މީޑީއާތައް ރެގިއުލޭޓް ކުރުމަށް މިހާރު އޮތް މޯލްޑިވްސް މީޑިއާ ކައުންސިލް (އެމްއެމްސީ) އާއި ބްރޯޑްކާސްޓިން ކޮމިޝަން (ބްރޯޑްކޮމް) އުވާލައި ރައީސުލްޖުމްހޫރިއްޔާގެ ފުރިހަމަ ކޮންޓްރޯލް އޮންނަ މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަން އުފައްދުމަށް ބިލެއް ހުށަހެޅުއްވީ، ސަރުކާރުގެ ކަންކަމަށް ތާއީދު ކުރައްވަމުން ގެންދަވާ ނަމަވެސް ވަކި ޕާޓީއަކަށް ނިސްބަތްވެވަޑައިނުގަންނަވާ ތުޅާދޫ ދާއިރާގެ މެންބަރު އަބްދުލްހައްނާނެވެ.
މިކަމާ ގުޅިގެން އެމްޑީޕީން ބުނީ، އެ ކޮމިޝަނަށް ގިނަ ބާރުތަކެއް ދިނުމަށް އެ ބިލުގައި ހުށަހަޅާފައި ވުމަކީ އެންމެ ބޮޑު ކަންބޮޑުވުން ކަމަށެވެ. އެމްއެމްސީ އާއި ބްރޯޑްކޮމް އެއްކޮށްލުމަށް ސަރުކާރުގެ ވިސްނުން ހުރިކަން ބަންޑާރަ ނައިބު ހާމަކޮށްފައި ވަނިކޮށް މި ބިލު އަމިއްލަ މެންބަރެއް ލައްވައި މަޖިލީހަށް ހުށަހަޅާފައި ވަނީ ސަރުކާރުގެ މަކަރުވެރި ރޭވުމެއްގެ ތެރެއިން ކަމަށް އެމްޑީޕީން ތުހުމަތު ކުރެއެވެ. މިއީ މީޑިއާގެ މިނިވަންކަން ކަފުން ކުރުމަށް ސަރުކާރު އަޑީގައި އޮވެގެން މަޖިލީހަށް ވައްދާފައިވާ ބިލެއް ކަމަށް އެމްޑީޕީން ބުނެއެވެ.
އެ ބިލުގައިވާ ގޮތުން، ބިލު ގާނޫނަކަށްވެ، އަމަލު ކުރަން ފެށުމާ އެކު އެމްއެމްސީ އާއި ބްރޯޑްކޮމްގެ މަސްއޫލިއްޔަތުތައް އަދާ ކުރުމަށް މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަން އުފެދޭނެއެވެ. މި ކޮމިޝަން އެކުލެވިގެން ވަނީ ހަތް މެންބަރުންގެ މައްޗަށް ކަމަށާއި އެއީ ރައްޔިތުންގެ މަޖިލީހުގެ ރުހުން ލިބިގެން ރައީސް އައްޔަން ކުރައްވާ ހަތަރު މެންބަރުންނާއި، މީޑިއާތަކުން އިންތިހާބު ކުރާ ތިން މެންބަރުންކަމަށް ބިލުގައި ބުނެފައި ވެއެވެ. ހަމައެއާއެކު އެ ކޮމިޝަންގެ ރައީސް އާއި ނައިބު ރައީސް އައްޔަން ކުރުމުގެ ބާރު ވެސް ދީފައި ވަނީ ރައީސަށެވެ. ރައީސް އެ ދެ މަގާމަށް ބޭފުޅުން ހަމަޖައްސަން ޖެހެނީ ކޮމިޝަންގެ މެންބަރުންގެ ތެރެއިން، މަޖިލީހުގެ ރުހުމާ އެކުއެވެ.
މިކަމާ ގުޅިގެން އެމްޑީޕީން ބުނީ، މިއީ މީޑިއާތައް އަމިއްލައަށް ރެގިއުލޭޓް ކުރުމަށް އޮތް މަގު ބަންދުވެ ސަރުކާރުގެ ނުފޫޒު މީޑިއާތަކުގެ މައްޗަށް ހައްދެއް ނެތި ހިންގުމަށް ފަހިކުރާ ފުރުސަތެއް ކަމަށެވެ. ހަމައެއާއެކު މީޑިއާތަކާއި ނޫސްވެރިން ޖޫރިމަނާ ކުރެވޭ ގޮތަށް ބިލުގައި ހިމަނާފައިވާ މާއްދަތަކަކީ ގާނޫނު އަސާސީން ކަށަވަރު ކޮށްދީފައިވާ ދުލާއި ގަލަމުގެ މިނިވަންކަމަށް ހުރަސް އަޅައި ޑިމޮކްރަސީގެ ހަތަރުވަނަ ބާރުގެ ގޮތުގައި ނޫސްވެރިންނާއި މީޑިއާތަކުން ކުރަމުންދާ މަސައްކަތްތައް ހުއްޓުވުމަށް ހިމަނާފައިވާ މާއްދާއެއް ކަމަށް ވެސް އެމްޑީޕީން ބުނެއެވެ.
ސަރުކާރަށް ފާރަވެރިވެ ސަރުކާރު ޖަވާބުދާރީ ކުރުވުމުގެ އެންމެ އިސް ޒިންމާއެއް އަދާކުރަނީ މީޑިއާތަކުން ކަމަށްވާއިރު މީޑިއާތަކުގެ މިނިވަންކަން ގެއްލޭ ގޮތަށް ހުށަހަޅާ އެއްވެސް ގާނޫނަކަށް ތާއީދު ނުކުރާނެ ކަމަށް އެމްޑީޕީން ބުނެއެވެ. ރައްޔިތުންގެ މަޖިލީހަށް ހުށަހަޅާފައިވާ ބިލު އަނބުރާ ގެންގޮސް މީޑިއާތަކަށް ހުރަސް އެޅުމަށް ސަރުކާރުން ރާވައި ހިންގަމުންދާ އެންމެހާ ކަންކަން ހުއްޓާލުމަށް އެ ޕާޓީން ވަނީ ގޮވާލާފައެވެ.
އެމްޑީޕީން މި ބިލާ މެދު ކަންބޮޑުވުން ފާޅުކޮށްފައިވާ އިރު، އެ ބިލާ ގުޅިގެން ހުރި ކަންބޮޑުވުން ފާޅުކުރައްވައި ގަލޮޅު ދެކުނު ދާއިރާގެ އެމްޑީޕީ މެންބަރު މީކާއީލް އަހްމަދު ނަސީމް ވަނީ ކުއްލި މައްސަލައެއް ހުށަހަޅާފައެވެ. ނަމަވެސް ޝަރުތު ފުރިހަމަނުވާ ކަމަށް ނިންމައި އެ ކުއްލި މައްސަލަ އެޖެންޑާ ނުކުރަން ރިޔާސަތުން ވަނީ ނިންމާފައެވެ. މި ބިލާ ގުޅޭގޮތުން މީޑިއާތަކުގެ އިސްވެރިންނާއި ނޫސްވެރިންގެ ޖަމިއްޔާތަކުން ވެސް ކަންބޮޑުވުން ފާޅުކޮށްފައިވެއެވެ.
ނަމަވެސް މި ބިލާ ގުޅިގެން ގިނަ ބައެއްގެ ފާޑުކިޔުން ސަރުކާރަށް އަމާޒުވާން ފެށުމުން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ މީޑިއާތައް ކޮންޓްރޯލް ކުރުމަކީ ގަބޫލުފުޅުކުރައްވާ ހަަމައެއް ނޫން ކަމަށް ވިދާޅުވެފައެވެ. މާތްވެގެންވާ އިސްލާމް ދީނާއި ރާއްޖޭގެ ގާނޫނު އަސާސީއާ ހިލާފްނުވާހާ ހިނދަކު ދިވެހި ދައުލަތުގެ ސިޔާދަތީ ބާރު ހިނގާ ސަރަހައްދުގައި ކޮންމެ ދިވެއްސަކަށް ވެސް އެމީހެއްގެ މިނިވަންކަމާ އެކީ އެމީހަކު ބޭނުން ކަމެއް ކޮށްގެން އުޅުމުގެ ހައްގު އޮންނާނެ ކަމަށް ވެސް ރައީސް ވަނީ ވިދާޅުވެފައެވެ.
