ވޯޓާ ބަންކަރިން ހިދުމަތަށް އެމްޕީއެލް އިން ހެދި ފެން ބާޖް ތިލަފުށި ޑޮކްޔާޑުން ބާލަައިފައެވެ.
ޖުމްލަ 200 ޓަނުގެ ފެން ރައްކާކުރެވޭ މި ފެން ބާޖް ބޭނުންކުރާނީ އުތުރުގައި ވޯޓާ ބަންކަރިން ހިދުމަތް ފޯރުކޮށްދިނުމަށް ކަމަށް އެމްޕީއެލް އިން ވަނީ ބުނެފައެވެ. މީގެ އިތުރުން އެމްޕީއެލް އިން ވަނީ މިއީ އުތުރުގައި އެ ކުންފުނިން ފޯރުކޮށްދޭ މެރިޓައިމްގެ ހިދުމަތަށް ލިބުނު އިތުރު ކުރިއެރުމެއްކަން ފާހަގަކޮށްފައެވެ.
ތިލަފުށީގައި ހުންނަ އެމްޕީއެލްގެ ޑޮކްޔާޑުގައި ބަނދެފައިވާ ބާޖު އިއްޔެ މޫދަށް ބާލާފައިވާއިރު އެމްޕީއެލްގެ ސީއީއޯ މުހައްމަދު ވަޖީހު އިބްރާހިމް ސޯޝަލް މީޑިއާގައި ކުރި ޕޯސްޓެއްގައި ވިދާޅުވީ މިދިޔަ ސެޕްޓެމްބަރު މަހު 19 ވަނަ ދުވަހު ބަންކަރިން ހިދުމަތް ފަށާފައިވާއިރު އެންމެ ފުރަތަމަ ބަންކަރިންއަށް ބޭނުން ކޮށްފައި ވަނީ، ކޮޅުވެއްޓިއެއްގައި ކަޅު ހަން ބަހައްޓައިގެން ކަމަށެވެ. އޭގެ ފަހުން ދެމަސް ދުވަސް ނުވަނީސް، ވޯޓާ ބަންކަރިން އަށް ތައްޔާރު ކުރި “ފެން ބާޖު” ހިދުމަތަށް ނެރެފައިވާ ކަމަށެވެ.
މީގެ އިތުރުން ވަޖީހު ވިދާޅުވީ މީގެ ފަހުން ވޯޓާ ބަންކަރިންއަށް ބޭނުން ކުރެވޭނީ މި ބާޖު ކަމަށާއި މިބާޖުގެ ހިދުމަތް ފުރިހަމަ ކުރުމަށްޓަކައި ލަސްތަކެއް ނުވެ، ބާޖުގައި ފެން ޕްލާންޓެއް ބަހައްޓައި، ބާޖުގައި ފެން އުފައްދައި ބޭނުން ކުރަން ފެށޭނެކަމަށެވެ.
