ރާއްޖޭގައި ކުދި ވިޔަފާރިތަކަށް ހުރަސްތަކެއް އަޅަމުންދިޔަ ބިދޭސީންގެ ވިޔަފާރިތައް ހުއްޓުވާ އެފަދަ ވިޔަފާރިތަކުގައި ގަވާއިދާ ހިލާފަށް އުޅެމުންދާ ބިދޭސީން 48 ގަޑިއިރުގެ ތެރޭގައި ފުރުވާލުމުގެ އިންތިޒާމުތައް މިހާރު ހަމަޖެހިފައި ވާކަމަށް ހޯމް މިނިސްޓަރު އަލީ އިހްސާން ވިދާޅުވެއްޖެއެވެ.
ސަރުކާރަށް އެއް އަހަރު ފުރުމުގެ ގޮތުން ސަރުކާރުގެ މަސައްކަތްތަކާ ގުޅޭ ގޮތުން ހަފުތާ 52ގެ ނަމުގައި ރޭ ކުރިއަށް ގެންދިޔަ ޕްރޮގްރާމުގައި ވާހަކަ ދައްކަމުން އިހްސާން ވިދާޅުވީ ގަވާއިދާ ހިލާފަށް އުޅޭ ބިދޭސީންގެ މައްސަލަ ހައްލުކުރުމަށް ބިދޭސީންގެ މައުލޫމާތު އެއްކުރުމަށް ފައްޓާފައިވާ "އޮޕަރޭޝަން ކުރަންގި"ގެ ދަށުން 10،000 އަށްވުރެ ގިނަ ބިދޭސީންގެ ބަޔޯމެޓްރިކްސް ނަގާފައިވާކަމަށެވެ.
ބިދޭސީންގެ މައުލޫމާތު އެއްކުރުމަށް ކުރިއަށްގެންދާ މި މަސައްކަތް އަންނަ އަހަރުގެ އެޕްރީލް މަހުގެ ނިޔަލަށް ނިންމުމަށް މަސައްކަތް ކުރަމުން ދާކަން ފާހަގަކުރަމުން އިހްސާން ވިދާޅުވީ ބިދޭސީންގެ މައްސަލަ ހައްލުކުރުމަށް ކުރިއަށްގެންދާ އޮޕަރޭޝަން ކުރަނގި ރާއްޖޭގެ 138 ރަށެއްގައި މިވަގުތު ކުރިއަށްދާކަމަށެވެ.
މީގެ އިތުރުން ގަވާއިދާ ހިލާފަށް ރާއްޖޭގައި ވިޔަފާރިކުރަމުންދިޔަ 5000 އެއްހާ ބިދޭސީން މިހާރު ރައްޖެއިން ފުރުވާލާފައިވާ ކަމަށާއި އަދި މިދާއިރާއިން ބޮޑު ބަދަލަކާ ދިމާއަށް ދިޔުމަށް ކުރަމުންދާ މަސައްކަތްތަކުގެ ތެރެއިން ރަނގަޅު މިސްރާބަކަށް މަސައްކަތް ކުރެވެމުންދާ ކަމަށެވެ.
މި ޕްރޮގްރާމްގައި މިނިސްޓަރު ވަނީ ވޭތުވެދިޔަ އެއް އަހަރު ދުވަހުގެ ތެރޭގައި ހޯމް މިނިސްޓްރީގެ ހިންގުން ހަރުދަނާކޮށް، ކުރެވިފައިވާ މުހިއްމު މަސައްކަތްތަކުގެ ތަފްސީލުތައްވެސް ހާމަކުރައްވާފައެވެ.
