ބާރުތައް ދޫކޮށްލުމަކީ ހުދުމުހުތާރުވެރިންނަށް ކުރަން ދަތި އުނދަގޫކަމެއް ކަމަށް ކުރީގެ ރައީސް އިބްރާހިމް މުހައްމަދު ސޯލިހް ވިދާޅުވެއްޖެއެވެ.
ރައީސް ސޯލިހް މިފަދައިން ވިދާޅުވީ "ފުދިއްޖެ، ފުނޑިއްޖެ" ނަމުގައި އާޓިފިޝަލް ބީޗުގައި އެމްޑީޕީއިން ރޭ ބޭއްވި ޖަލްސާގައި ވާހަކަފުޅު ދައްކަވަމުންނެވެ.
ރައީސް ސޯލިހް ވިދާޅުވީ މި ސަރުކާރުން ބާރުތައް ޖަމާކުރަމުން ގެންދަނީ ބާރު ސްޕީޑްގައި ކަމަށެވެ. އެގޮތުން ގާނޫނު އަސާސީގައި ބާރުތައް ވަކިކޮށްފައި ހުރި މިނިވަން މުއައްސަސާތައް މުށުތެރެއަށް ލައި ބާރުތައްޖަމާކުރަމުންދާ ކަމަށާއި ސަރުކާރުން މަސައްކަތް ކުރަމުންދަނީ އޭސީސީ އަދި އީސީގެ ރައީސްގެ މަގާމުގައި ހުންނަވާ މީހާއަކީ ރައީސުލްޖުމްހޫރިއްޔާ ރުހި ގަބޫލުވާ މީހެއް ކަމުގައި ހެދުމަށް ކަމަށް އެމަނިކުފާނު ވިދާޅުވިއެވެ.
އޭސީސީ އަދި އީސީގެ މެންބަރުން ބަދަލުކުރުމަށް މަޖިލީހަށް ހުށަހަޅާފައިވާ ކަމަށާއި އެކަން ކުރުމުގެ ބޭނުމަކީ ބާރުތައް ޖަމާކޮށް ކުރިއަށް އޮތް 2028ގެ ރިޔާސީ އިންތިހާބު ފޭރިގަތުން ކަމަށް ވެސް ރައީސް ސޯލިހް ވަނީ ވިދާޅުވެފައެވެ. އެ ފުރުސަތުދީގެން ނުވާނެ ކަމަށާއި މިއަދު މިކަމާ ދެކޮޅަށް ނުތެދުވެއްޖެނަމަ، 2028 ވަނަ އަހަރު އަންނައިރު އެއްވެސް ކަމެއް ނުކުރެވޭ ހިސާބަށް ކަންކަން ދާނެކަމަށް ރައީސް ސޯލިހް ވަނީ ވިދާޅުވެފައެވެ.
ރައީސް ސޯލިހް ވިދާޅުވީ ބާރުތައް ދޫކޮށްލުމަކީ ހުދުމުހުތާރުވެރިންނަށް ކުރަން ދަތި އުނދަގޫކަމެއް ކަމަށެވެ. އަދި އެކަން ނުކުރަން އުޅެނީ ރައްޔިތުން ދެކެ ބިރުގަތުމުގެ އިތުރުން ދޮގު ހަދާ އޮޅުވާލައިގެން ވެރިކަމަށް ވަޑައިގެންނެވި ބޭފުޅަކަށްވުމުން ކަމަށް ރައީސް ސޯލިހް ވިދާޅުވިއެވެ.
