އަންނަ އަހަރުން ފެށިގެން އެންމެ މުއްސަނދިން އަތުން އާސަންދައަށް ވަކި އަދަދެއް ދައްކަންޖެހޭ ގޮތަށް ބަދަލު ގެނައުމަށް ސަރުކާރުން ނިންމައިފިއެވެ.
މިފަދައިން ނިންމާފައި ވަނީ ދައުލަތުގެ ހަރަދުގައި ހިލޭ ބޭސްފަރުވާ ކޮށްދޭ ނިޒާމު އާސަންދަ އަށް ކުރާ ހޭދަ ކުޑަކުރުމަށްޓަކައެވެ. މިހާރުވެސް ދައުލަތުން ބޮޑު ހަރަދެއް ކުރަމުން އަންނަ އާސަންދަ ނިޒާމަށް މި ބަދަލު ގެނެއުމަށް ނިންމާފައި ވަނީ އަންނަ އަހަރަށް ލަފާކޮށް ރައްޔިތުންގެ މަޖިލިހަށް ހުށަހަޅާފައިވާ ބަޖެޓުގަ އެވެ.
އާސަންދައިގެ ހަރަދުތައް ކުޑަ ކުރުމަށް ސަރުކާރުން ވަނީ މުހިންމު ދެ ބަދަލެއް ގެނެއުމަށް ނިންމާފައެވެ. އަންނަ އަހަރުގެ އޭޕްރީލް މަހުން ފެށިގެން އާސަންދައަށް ގެނެއުމަަށް ނިންމާފައިވާ މުހިންމު ދެ ބަދަލަކީ:
1. ޕްރައިވެޓް ހޮސްޕިޓަލްތަކުން ހޯދާ ހިދުމަތްތައް ޕެކޭޖުތަކެއް ތަައާރަފް ކުރުން:
އެގޮތުން އެންމެ ގިނައިން އާމްދަނީ ލިބޭ މީހުންގެ އަތުން ފާމަސީތަކާއި ސަރުކާރުގެ ހޮސްޕިޓަލުތަކުން ހޯދާ ބައެއް ސިއްހީ ހިދުމަތްތަކަށް ކޯ-ޕޭ ނިޒާމެއް ތައާރަފުކުރަން ޕްލޭނެއް ވަނީ ހިމަނާފައެވެ.
އަދި ހަމައެހެންމެ ހޮސްޕިޓަލްތަކުން އާސަންދައިން ކަނޑާ އަދަދުތައް އެއްހަމަ ކުރުމުގެ އިތުރުން އެންސްޕާ މެދުވެރިކޮށް ފޯރުކޮށްދޭ މެޑިކަލް ވެލްފެއާ ނިޒާމަށް ވެސް ބަދަލުތަކެއް ގެންނަން ނިންމާފައި ވެއެވެ.
2. އެންމެ ގިނައިން އާމްދަނީ ލިބޭ މީހުންގެ އަތުން ވަކި އަދަދެއް ނެގުމަށް:
ބަޖެޓު ތަފްސީލު ރިޕޯޓުގައި ވަނީ މަހަކު 60،000 ރުފިޔާއަށް ވުރެ ގިނައިން އާމްދަނީ ލިބޭ ނުވަތަ އިންކަމް ޓެކްސް ދައްކަން ޖެހޭ މީހުންގެ އަތުން ވަކި އަދަދެއް ނަގަން ހިމަނާފަ އެވެ. ފިނޭންސް މިނިސްޓްރީން ބުނެފައި ވަނީ އެގޮތަށް "ކޮންޓްރިބިއުޝަން" އާއެކު، އާސަންދަ ނިޒާމު ހަރުދަނާ ކުރެވޭނެ ކަމަށާއި އެންމެ ފަގީރު ހާލުގައި އުޅެމުންދާ މީހުންނަށް މާލީ ބުރައަކާ ނުލާ ސިއްހީ ހިދުމަތް ލިބޭނެކަން ކަށަވަރު ކުރެވޭނެ ކަމަށެވެ.
އެންމެ މުއްސަދިންގެ އަތުން ފާމަސީތަކާއި ސަރުކާރުގެ ހޮސްޕިޓަލުތަކުން ހޯދާ ބައެއް ސިއްހީ ހިދުމަތްތަކަށް ވެސް ކޯ-ޕޭ ނިޒާމެއް ތައާރަފް ކުރުމަށް ވަނީ ޕްލޭން ކޮށްފައެވެ. އެގޮތަށް ހަމަޖެއްސީ އަމިއްލަ އަތުން އަހަރެއްގެ މައްޗަށް ގިނަވެގެން ހަރަދުކުރަން ޖެހޭ އެންމެ މިންވަރުތައް ކަނޑައެޅުމަށްފަހުގައި ކަމަށް އެ ރިޕޯޓުގައި ވެއެވެ.
"ކޮންޓްރިބިއުޝަން" ގެ ނިސްބަތާއި އަހަރެެއްގެ ތެރޭގައި ގިނަވެގެން ހަރަދުކުރަން ޖެހޭ އަދަދު ފިނޭންސް މިނިސްޓްރީން ކަނޑައަޅާފައި ވަނީ އާމްދަނީގެ ގިންތިތަކަށް ބެލުމަށްފަހު އެވެ. އެހެންނަމަވެސް އެކަން ކުރާއިރު އުމުރުން 18 އަހަރު ނުވާ ކުދިންނާއި 65 އަހަރުން މަތީގެ މީހުންގެ އިތުރުން ދިގު މުއްދަތަށް ފަރުވާ ހޯދަން ޖެހޭ ބަލިތަކަށް ފަރުވާ ކުރަމުންދާ މީހުން އިސްތިސްނާ ކުރާނެ ކަމަށް ވެއެވެ.
މި ބަދަލުތަކާއެކު އާސަންދަ އިން 600 މިލިއަން ރުފިޔާއާ ގާތް ކުރާ އަދަދެއް އާސަންދައިން ކުޑަ ކުރެވޭނެ ކަމަށް ވަނީ އަންދާޒާ ކޮށްފައެވެ. ދާދި ފަހުން ވަނީ ޕްރައިވެޓް އިންޝުއަރެންސެއް އޮތް ނަމަ އެ އިންޝުއަރެންސްގެ ލިމިޓް ހަމަވުމުން ނޫން ގޮތަކަށް އާސަންދަ ދޫނުކުރަން ނިންމާފައެވެ.
މިދިޔަ އަހަރު އާސަންދަ ސްކީމަށް ޖުމުލަ 3.2 ބިލިއަން ރުފިޔާ ބިލުކުރެވިފައިވާއިރު މީގެ ތެރެއިން 1.1 ބިލިއަން، ހޭދަކުރެވިފައިވަނީ ބޭހާއި ކޮންސިއުމަބަލްސްގެ ގޮތުގައި ބޭސްފިހާރަތަކަށް ކަމަށް ފިނޭންސް މިނިސްޓްރީގެ ތަފާސް ހިސާބުތަކުން ދައްކައެވެ. އަދި ވޭތުވެދިޔަ 5 އަހަރު ތެރޭގައި އާސަންދައިގެ ނިޒާމަށް ކުރާ ހަރަދު އެވްރެޖްކޮށް 65 ޕަސެންޓް އިތުރުވެފައިވާކަމަށް ތަފާސް ހިސާބުތަކުން ދައްކައެވެ.
