މާލޭ ސަރަހައްދުގެ މަގުތަކުގައި އުޅޭ ބުޅާތައް ބަލަހައްޓަން ސަރުކާރުން ހެދި "އޮޅު ހިޔާ" އަށް ބުޅަލުގެ ކާނާ ސަޕްލައި ކޮށްދޭނެ ފަރާތެއް ހޯދަން އިއުލާން ކޮށްފިއެވެ.
މާލެ ސިޓީ ކައުންސިލުން ކުރި އިއުލާނެއްގައި ބުނީ، އެކަމަށް ޝައުގުވެރިވާ ފަރާތްތަކުން މައުލޫމާތު ސާފުކުރުމާއި އަގު ހުށަހެޅުން މި މަހުގެ 20 ވަނަ ދުވަހުގެ 10:00 ގައި އޮންނާނެ ކަމަށެވެ. އަދި އެ ގަޑި އަށް މައުލޫމާތު ސާފުކުރަން ނުދާ ފަރާތްތަކާއި ގަޑި ޖެހުމުގެ ފަހުން އަންދާސީ ހިސާބު ބަލައިނުގަންނާނެ ކަމަށް ކައުންސިލުން ވަނީ ބުނެފައެވެ. ކައުންސިލުން ބުނީ، އަގު ހުށަހެޅުމުގައި ބައިވެރިވެވޭނީ ދިވެހި ކުންފުނިތަކާއި ޕާޓްނާޝިޕާއި ލޯކަލް އިންވެސްޓްމެންޓް އަދި ވިޔަފާރި ކުރުމުގެ ހުއްދަ ލިބިފައިވާ ފަރާތްތަކަށް ކަމަށެވެ.
ސަރުކާރުން ހެދި ބުޅާ ފެސިލިޓީ މިދިޔަ ހަފުތާގައި ހުޅުވި ނަމަވެސް އަދި އެ ތަނަށް ބުޅާތައް ގެންދަން ފަށާފައެއް ނުވެއެވެ. އަގްރިކަލްޗާ އެންޑް އެނިމަލް ވެލްފެއާ މިނިސްޓަރު ޑރ. އައިޝަތު ރަމީލާ ވިދާޅުވީ މާލެ ސަރަހައްދުގެ މަގުތަކުގައި 4000 އަށްވުރެ ގިނަ ބުޅާ އުޅޭކަމަށާއި މިބުޅާތަކުގެ ތެރޭގައި އެކި ހާލަތްތަކުގައި ތިބި ބުޅާތައް ފާހަގަ ކުރެވޭ ކަމަށާއި، މިބުޅާތައް އެއްފަހަރާ ނެގުމަކީ ފަސޭހަ އަދި އެންމެ ރައްކާތެރި ކަމަކަށްވެސް ނުވާނެކަމަށެވެ.
ފެސިލިޓީއަށް ބުޅާތައް ގެންދިޔުމަށް ހާއްސަ ޕްލޭނެއް ހަދާފައިވާ ކަމަށާއި، މިޕްލޭންގެ ދަށުން ބުޅާތައް ނަގަމުންދާނީ ބެޗްތަކަށްކަމަށް މިނިސްޓަރު ވަނީ ވިދާޅުވެފައެވެ. އިތުރަށް މިނިސްޓަރު ވިދާޅުވީ މިހާރު ގާއިމު ކުރެވިފައިވާ ފެސިލިޓީން އެއްފަހަރާ 4000 ބުޅަލަށް ގެންގުޅެވޭނެ ކަމަށާއި މިފެސިލިޓީން ފަރުވާދޭނީ އެތަނަށް ގެންދާ ބުޅަލަށް އެކަނި ނޫންކަމަށާއި ޕެޓްގެ ގޮތުގައި އާންމުން ގެންގުޅޭ ބުޅާތަކަށްވެސް ފަރުވާ ދޭނެކަމަށެވެ.
