އިންގްލިޝް ޕްރިމިއާ ލީގުގެ ޗެމްޕިއަން މެންޗެސްޓާ ސިޓީ 18 އަހަރުގެ ތެރޭގައި ފުރަތަމަ ފަހަރަށް ޖައްސަ ޖައްސައިގެން 4 މެޗުން ބަލިވެއްޖެއެވެ.
މިގޮތުން، މިރޭ ލީގުގައި އެޓީމު ވަނީ ބްރައިޓަން އަތުުން 2-1 އިން ބަލިވެފައެވެ.
މިމެޗުގައި ފުރަތަމަ ލަނޑެއް ޖަހާ ލީޑު ނެގީ ސިޓީންނެވެ. ފުރަތަމަ ހާފްގައި މެޗުގެ 23 ވަނަ މިނެޓްގައި މިލަނޑު އެޓީމަަށް ކާމިޔާބުކޮށް ދިނީ ފޯވަޑް އާލިންގް ހާލެންޑެވެ.
މެޗުގެ ފުރަތަމަ ހާފް ނިމުނީ ސިޓީ ކުރީގައި އޮވެގެންނެވެ. އެހެން ނަމަވެސް ދެވަނަ ހާފް ނިމެންދަނިކޮށް ފަސް މިނެޓްގެ ތެރޭގައި ދެލަނޑު ޖަހައިގެން ބްރައިޓަން ވަނީ ނަތީޖާ އަނބުރާލާފައެވެ.
މި ނަތީޖާއާއެކު ވެސް ސިޓީ އަދި ވެސް އޮތީ ތާވަލުގެ ދެވަނައިގައެވެ. އެއްވަނައިގައި އޮތް ލިވަޕޫލް މިރޭ އެސްޓަން ވިލާއާ ކުޅޭ އިރު މި މެޗުން ތިން ޕޮއިންޓް ހޯދައިގެން ލިވަޕޫލަށް ސިޓީއާ 5 ޕޮއިންޓް ދުރަށް ޖެހިލުމުގެ ފުރުސަތު އެބައޮތެވެ.
މިރޭގެ ނަތީޖާއާއެކު ސިޓީގެ ކޯޗު ޕެޕް ގާޑިއޯލާއަށް ވެސް މިވަނީ ހައިރާންކުރުވަނިވި ރިކޯޑަކާ ކުރިމަތިލާންޖެހިފައެވެ. މިއީ މީގެ ކުރިން ބާސަލޯނާ އަދި ބަޔާން މިއުނިކް ކޯޗުކޮށް ދިން ގާޑިއޯލާގެ ޓީމެއް ޖެހިޖެހިގެން 4 މެޗުން ބަލިވި ފުރަތަމަ ފަހަރެވެ.
ކަރަބާއޯ ކަޕްގައި ސިޓީ ޓޯޓެންހަމް އަތުން 2-1 އިން ބަލިވެ އެމުބާރާތުން ކެޓިތާ މާ ގިނަ ދުވަހެއް ނުވެ ކުޅުނު ލީގު މެޗުގައި ވަނީ ބޯންމޮތް އަތުން 2-0 އިން ބަލިވެފައެވެ. އަދި ހުސްވި ހަފްތާގެ ޗެމްޕިއަންސް ލީގު މެޗުގައި ޕޯޗުގަލްގެ ސްޕޯޓިން 4-1 އިން ސިޓީ ބަލިކުރިއެވެ.
