ދުޅަހެޔޮ މުޖުތަމައެއް ބިނާކުރުމަށް ސިއްހީ ދާއިރާއިން ކުރަމުންދާ މަސައްކަތްތަކާއި ސިއްހީ ގޮތުން ދުޅަހެޔޮ އާދަތަކަށް އާންމުން ހޭލުންތެރިކުރުމާއި ގުޅޭ މައުލޫމާތު ރައްޔިތުންނަށް ފޯރުކޮށްދިނުމަށް، ފުރިހަމަ ސިއްހަތަކަށް މުޅި ގައުމު އެކުގައި މި ތީމާއި އެކު ކުރިއަށްގެންދާ "ހެލްތު އެކްސްޕޯ 2024" ފަށައިފިއެވެ.
ހުޅުމާލެ ސެންޓްރަލް ޕާކުގައި ކުރިއަށްދާ މި އެކްސްޕޯ ފައްޓަވައިދެއްވީ ނާއިބު ރައީސް ހުސައިން މުހައްމަދު ލަތީފްއެވެ. އަދި ނައިބު ރައީސް ވަނީ ސަރުކާރަށް އެއް އަހަރު ފުރުމާއި ގުޅިގެން "ހަފްތާ52" ގެ ނަމުގައި ތައްޔާރުކޮށްފައިވާ ހާއްސަ ފޮތް ވެސް ނެރެދެއްވާފައެވެ.
މި ރަސްްމިއްޔާތުގައި ވާހަކަ ދައްކަވަމުން ހެލްތް މިނިސްޓަރު އަބްދުﷲ ނާޒިމް އިބްރާހީމް ވިދާޅުވީ މި އަހަރު މިފެށި އެކްސްޕޯ ކުރިއަށް އޮތް ތަނުގައި ކޮންމެ އަހަރަރަކު ބާއްވާނެ ކަމަށެވެ. އަދި މި އަހަރު އެކްސްޕޯ މާލޭގައި ބޭއްވި ނަމަވެސް ކުރިއަށް އޮތް ތަނުގައި ރާއްޖޭގެ އެހެން ރަށްރަށަށް ވެސް ފުޅާ ކުރައްވާނެ ކަމަށް ނާޒިމް ވިދާޅުވިއެވެ.
މީގެ އިތުރުން މިނިސްޓަރު ވަނީ ރައީސް ސިއްހީ ދާއިރާ ކުރިއެރުވުމަށް ކުރައްވަމުން ގެންދަވާ މަސައްކަތް ފާހަގަކުރައްވާފައެވެ. އެގޮތުން މި ދައުރު ނިމޭއިރު ސިއްހީ ދާއިރާ އެހެން ހަރުފަތަކަށް ގެންދަވާނެ ކަމުގެ ޔަގީންކަން ރައްޔިތުންނަށް ދެއްވިއެވެ.
ދުޅަހެޔޮ އާބާދީއަކަށް ވުރެ ބޮޑު އެސެޓެއް ގައުމެއްގައި ނޯންނާނެކަން ފާހަގަކުރައްވާ މިނިސްޓަރު ވިދާޅުވީ މި އެކްސްޕޯގެ މަގްސަދަކީ ވެސް ސިއްހީ މައުލޫމާތު ފޯރުކޮށްދީ ބަލިވީމަ ބޭސްކުރާ ނިޒާމެއްގެ ބަދަލުގައި ބަލިވުމުގެ ކުރިން އެކަމަށް އަޅަންޖެހޭ ފިޔަވަޅުތަކާއި އާދަ އަށަގަތުމަށް އާންމުން ހޭލުންތެރިކުރުން ކަމަށެވެ.
މި ވޭތުވެދިޔަ އެއް އަހަރު ދުވަހުގެ ތެރޭގައި ސިއްހީ ދާއިރާއިން ހޯދާފައިވާ ކާމިޔާބީތަކަށް ވެސް މިނިސްޓަރުގެ ވާހަކައިގައި އަލި އަޅުވާލެއްވިއެވެ. އެގޮތުން އެއާ އެމްބިއުލާންސްގެ ހިދުމަތް، ކޮލިޓީ ބޭސް އަދި ކާބޯތަކެތީގެ ރައްކާތެރިކަމުގެ ގާނޫނަށް އަމަލުކުރަން ފެށުން މިނިސްޓަރު ފާހަގަކުރެއްވި އެވެ.
"ހެލްތު އެކްސްޕޯ 2024 "ގައި 50 އަށްވުރެ ގިނަ ބައިވެރިން ބައިވެރިވެފައިވެއެވެ. އެކްސްޕޯ ކުރިއަށް ގެންދިއުމަށް ހަމަޖެހިފައި ވަނީ މިރޭ 11:00 އާ ހަމައަށެވެ. ކުޑަކުދިންނަށް ވެސް ބައިވެރިވެވޭގޮތަށް ކުރިއަށްދާ މިއެކްސްޕޯގައި ކުޑަކުދިންގެ ހެލްތު ޗެކަޕް، މިންހެޔޮ ކާނާއާއި ގުޅޭ މައުލޫމާތު، ހެދިބޮޑުވުމާއި ގުޅޭ މައުލޫމާތު، ވެކްސިން އަދި އެހެނިހެން ސިއްހީ މައުލޫމާތު ފޯރުކޮށްދިނުން ކުރިއަށްދާނެއެވެ.
