އަލިފާނުގެ ހާދިސާ ހިނގި ވަގުތު ސަފާރީގައި 12 ފަޅުވެރިން ތިބި ނަމަވެސް އެކަކަށްވެސް އަނިޔާ ނުވާ ކަމަށް އެމްއެންޑީއެފް އިން ބުނެފިއެވެ.
ރޭ މެންދަމު 3 ޖަހާކަށްހާއިރު ހުޅުމާލެ ފަޅުތެރޭގައި، ވެމްކޯ ޖެޓީ ސަރަހައްދުގައި ސަފާރީތައް އަޅާ ސަރަހައްދުގައި އޮތް "ބުލޫވޭގާ" ނަމަކަށް ކިޔާ ސަފާރީއެއްގައި އަލިފާން ރޯވެ މުޅި ސަފާރީ ވަނީ އަނދާ އަޅިއަށް ވެފައެވެ.
އެކަމާ ގުޅޭ އެންމެ ފަހުގެ މައުލޫމާތު ހިއްސާ ކުރަމުން އެމްއެންޑީއެފް އިން ބުނީ، އެ ހާދިސާ ހިނގިއިރު އެ ސަފާރީގައި 12 ފަޅުވެރިން ތިބި ކަމަށާއި އެ އެންމެންވެސް ކައިރީގައި އޮތް ޑައިވިން ދޯންޏަކަށް އަރާ ސަލާމަތްތެރިކަން ހޯދާފައިވާ ކަމަށް އެމްއެންޑީއެފް އިން މައުލޫމާތިު ދިނެވެ. ހަމައެހެންމެ މި ހާދިސާގައި އެއްވެސް މީހަކަށް އަނިޔާއެއް ލިބިފައި ނުވާ ކަމަށްވެސް އެމްއެންޑީއެފް އިން ބުންޏެވެ.
ފަޅުވެރިންގެ ގޮތުގައި ތިބީ 7 ދިވެހިންނާއި ސްރީލަންކާ، ބަންގްލަދޭޝް އަދި އިންޑިއާ އަށް ނިސްބަތްވާ 5 ބިދޭސީން ކަމަށް އެމްއެންޑީއެފް އިން މައުލޫމާތު ދިނެވެ. އަދި ސަފާރީގައި އަލިފާން ރޯވި އިރު އޭގައި ހުރީ ޑައިވިން ކުރުމަށް ބޭނުންކުރާ ސާމާނުކަން އެ ސަފާރީގެ ކެޕްޓަން އާއި ހަވާލާދީ އެމްއެންޑީއެފް އިން ބުންޏެވެ.
ނަމަވެސް ސަފާރީގައި އަލިފާނުގެ ހާދިސާ ހިނގަން މެދުވެރިވި ސަބަބު އެމްއެންޑީއެފް އިން މިހާތަނަށް ހާމަކޮށްފައި ނުވާއިރު ސޯޝަލް މީޑިއާގައި ދައުރުވި ވީޑިއޯއިން ފެންނަ ފެނުމަށް މުޅި ސަފާރީގައި ވަނީ އަލިފާން ހިފާ ވަރަށް ބޮޑަށް ރޯވެފައެވެ. އަދި ކަޅު ބޯ ދުންތައް އަރާތަން ފެންނަ އިރު މީހެއްގެ ހިލަމެއް ވާތަނެއް ނުފެނެއެވެ. ސަފާރީ ވަނީ އަލިފާން ރޯވުމުގެ ސަބަބުން ވަރަށް ބޮޑަށް ހަލާކުވެފައި ކަމަށް އެމްއެންޑީއެފް އިން ވެސް ވަނީ މައުލޫމާތު ދީފައެވެ.
