ޓެކްސް ކޮމިޝަނަރުގެ ނައިބު ކަމަށް ފާތިމަތު އަމީޒާ އައްޔަންކުރަން ފެންނަ ކަމަށް ރައްޔިތުންގެ މަޖިލީހުން ރުހުންދީފިއެވެ.
އެ މަގާމަށް ކުރިމަތިލެއްވި ބޭފުޅުންގެ ތެރެއިން އަޒީމާގެ އިތުރުން މަގާމު ފުރުއްވަމުން ގެންދެވި އަސްމާ ޝަފީއުގެ ނަން ރައީސް ޑރ. މުހައްމަދު މުއިއްޒު ފޮނުއްވީ މިދިޔަ މަހުގެ 23 ގައެވެ.
އަމީޒާ އަށް ރުހުންދިނުމާ މެދު ގޮތެއް ކަނޑައެޅުމަށް ރިޔާސަތުން ވޯޓަށް އެހުމުން، ވޯޓުގައި ބައިވެރިވި 64 މެންބަރުން ވެސް ވަނީ އަޒީމާ އަށް ރުހުން ދޭން ނިންމައިފައެވެ.
ޓެކްސް ނެގުމާ ބެހޭ އިދާރީ ގާނޫނުގައިވާ ގޮތުން، މީރާ ހިންގާ ބޯޑުގައި ހިމެނެނީ ޓެކްސް ކޮމިޝަނަރާއި ޑެޕިއުޓީ ޓެކްސް ކޮމިޝަނަރާއި ފަސް މެންބަރުންނެވެ. ކޮންމެ މެންބަރެއްގެ ވެސް ދައުރަކީ ފަސް އަހަރުގެ މުއްދަތެކެވެ.
ޓެކްސް ކޮމިޝަނަރުގެ ނައިބު ކަމަށް ކުރިމަތިލުމަށް ހުޅުވާލީ މީގެ ކުރިން އެ މަގާމުގައި ހުންނެވި އަސްމާގެ ދައުރު މިދިޔަ މަހުގެ ނިޔަލަށް ހަމަވާތީއެވެ.
