ރާއްޖޭގައި މިހާތަނަށް ބާއްވާ އެންމެ ބޮޑު ހެލްތް އެކްސްޕޯ ބާއްވަން ހެލްތް މިނިސްޓްރީން ތައްޔާރުވެއްޖެ އެވެ.
'ފުރިހަމަ ސިއްހަތަކަށް މުޅި ގައުމު އެކުގައި' މި ޝިއާރާއެކު އެ މިނިސްޓްރީން ކުރިއަށް ގެންދާ ހެލްތް އެކްސްޕޯ އޮންނާނީ ހުޅުމާލެ ސެންޓްރަލް ޕާކުގައެވެ.
މި އެކްސްޕޯ ކުރިއަށް ގެންދިއުމަށް ހަމަޖެހިފައި ވަނީ ދެ ދުވަހުގެ މުއްދަތަކަށެވެ. އެއީ ނޮވެމްބަރު 7 އަދި 8 ވަނަ ދުވަހު އެވެ. މިއީ ދުޅަހެޔޮކަން ދެނަގަތުމާއި ހޭލުންތެރި ކުރުމުގެ ޕްރޮގްރާމްތައް އެއްތަނަކުން ލިބިގެންދާނެ އެކްސްޕޯއެއް ކަމަށް ހެލްތް މިނިސްޓްރީން ވަނީ ބުނެފައެވެ.
އަދި މި އެކްސްޕޯ ކުރިއަށް ދާނީ ސިއްހީ މައުލޫމާތުގެ އިތުރުން މުނިފޫހިފިލުވުމުގެ ހަރަކާތްތަކާއެކު ކަމަށް ވެސް އެ މިނިސްޓްރީން ބުނެއެވެ.
ހެލްތް އެކްސްޕޯ ކުރިއަށްދާނެ ގަޑިތައް:
- 7 ނޮވެމްބަރު 2024: ރޭގަނޑު 20:00 - 23:00
- 8 ނޮވެމްބަރު 2024: ހަވީރު 16:00 - 18:00 އަދި ރޭގަނޑު 20:00 - 23:00
ހެލްތް މިނިސްޓްރީން ބުނި ގޮތުގައި ހަވީރު އެކްސްޕޯކުރިއަށްދާނީ ކުޑަކުދިންގެ ހަވީރަކާއެކުއެވެ. އަދި އެކްސްޕޯގައި ކުޑަކުދިންގެ ހެލްތު ޗެކަޕް، މިންހެޔޮ ކާނާއާއި ގުޅޭ މައުލޫމާތު، ހެދިބޮޑުވުމާއި ގުޅޭ މައުލޫމާތު، ވެކްސިން އަދި އެހެނިހެން ސިއްހީ މައުލޫމާތު ލިބިގެންދާނެއެވެ.
މީގެ އިތުރުން "ހެލްތް އެކްސްޕޯ 2024"ގައި ސިއްހީ ދާއިރާއިން ތައުލީމް ހާސިލް ކުރުމަށް ބޭނުންވާ ފަރާތްތަކަށް ހުރި ފުރުސަތުތަކުގެ މައުލޫމާތު ދިނުމާއި ޑޮކްޓަރަށް ދެއްކުމާއި ހެލްތު ސްކްރީނިންގް ހިދުމަތާއި އެކިއެކި ބަލި ބައްޔާއާއި ގުޅޭ މައުލޫމާތު ތަކާއި އިރުޝާދުތައް ވެސް ދޭނެ ކަމަށް އެ މިނިސްޓްރީން ވަނީ މައުލޫމާތު ދީފައެވެ.
މި އެކްސްޕޯގައި ޒުވަނުންނަށް ހާއްސަ ހަރަކާތްތަކާއި ނަފްސަނީ ދުޅަހެޔޮ ކަމާ ގުޅޭ މައުލޫމާތުތަކުގެ އިތުރުން ހެލްތީ ފުޑް ސްޓޯލްތަކާއިއެކު ކެއުން ބުއިމުގެ އާދަތަކާއި ގުޅޭ މައުލޫމާތު ވެސް ލިބިގެންދާނެ އެވެ. މުނިފޫހި ފިލުވުމުގެ ހަރަކާތްތަކުގެ ތެރޭގައި ސްޓޭޖު ޝޯ އާއި ފަންނާނުންގެ ހަރަކާތްތަކާއެކު ކަމަށް ހެލްތް މިނިސްޓްރީން ބުނެއެވެ.
