"ހިޔާވަހި ފައިނޭންސިން" ޕްރޮގްރާމްއަށް ކޮންމެ އަހަރަކު ވެސް 1 ބިލިއަން ރުފިޔާ ބަޖެޓް ކުރައްވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސް މިފަދައިން ވިދާޅުވީ ހިޔާވަހި ފައިނޭންސިން ޕްރޮގްރާމް އިފްތިތާހުކުރުމަށް މިއަދު ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.
ރައީސް ވިދާޅުވީ މި ސަރުކާރުން މަސައްކަތް ކުރާނީ ރައްޔިތުންނަށް އެންމެ މުހިންމުވެފައިވާ ކަންކަމަށް އިސްކަންދީގެން ކަމަށެވެ. އަދި ދިވެހި ރައްޔިތުންނަށް އެންމެ ބޮޑުވެފައިވާ މައްސަލައަކީ ގެދޮރުވެރިކަމުގެ މައްސަލަ ކަމަށްވުމާއެކު އެންމެ އިސް ސިޔާސަތަކީ ބޯހިޔާވަހިކަމުގެ މައްސަލައަށް ދާއިމީ ހައްލެއް ގެނެސްދިނުން ކަމަށް އެމަނިކުފާނު ވިދާޅުވިއެވެ.
ރައީސް ވިދާޅުވީ މި ހިޔާވަހި ފައިނޭންސިން ޕްރޮގްރާމްއަކީ މިއަދު ފަށާފައި އަންނަ އަހަރު ހުއްޓާލަން ފެށި ސްކީމެއް ނޫން ކަމަށާއި މިއީ ދާއިމީ ގޮތެއްގައި ކޮންމެ އަހަރަކުވެސް ކުރިއަށް ގެންދާނެ ޕްރޮގްރާމްއެއް ކަމަށެވެ. އަދި މި ޕްރޮގްރާމްއަށް އަންނަ އަހަރުގެ ބަޖެޓުގައި 1 ބިލިއަން ރުފިޔާ ހިމަނުއްވާފައިވާނެ ކަމަށާއި ކުރިއަށް އޮތް 4 އަހަރުގެ ބަޖެޓުގައި ވެސް މި ޕްރޮގްރާމްއަށް 1 ބިލިއަން ހިމަނުއްވާނެ ކަމަށް ރައީސް ވިދާޅުވިއެވެ.
ބަޖެޓުގައި ކޮންމެ އަހަރު ހިމަނާ 1 ބިލިއަން ރުފިޔާ ބޭނުންކޮށްގެން (އިންވެސްޓްކޮށްގެން) 2 ބިލިއަނަށްވުރެ ގިނަ ރުފިޔާގެ ލޯނު ދޫކުރެވޭނެ ކަމަށް ރައީސް ވިދާޅުވިއެވެ. މި ލޯނު ސްކީމް ޕްރޮގްރާމްގެ ދަށުން ގޯތި ލިބި، ގެދޮރު ބިނާކުރެވޭނެ ގޮތެއް ނެތް މީހުންނަށާއި ގެދޮރު އިމާރާތް ކުރަން ފަށައި، އެ މަސައްކަތް ނުނިމި ހުރި މީހުންގެ އިތުރުން ގޯތީގެ ބެހެނިވެރިންނާއެކު ގެދޮރު އިމާރާތް ކުރުމުގެ ފުރުސަތު ފަހިވެގެންދާނެކަން ރައީސް ފާހަގަކުރެއްވިއެވެ.
ރައީސް ވިދާޅުވީ އަޒުމަކީ މި ދައުރު ނިމިގެންދާ އިރު، ރާއްޖޭގައި ގެދޮރުވެރިކަމަށް ފުރުސަތު ނުލިބޭ އެއްވެސް ނުހުރުން ކަމަށެވެ. އަދި ވައުދުވެވަޑައިގެންނެވި ގޮތަށް ވައުދުފުޅުތައް ފުއްދަވާނެ ކަމުގެ ޔަގީންކަން ރައީސް ވަނީ ދެއްވާފައެވެ.
ގެދޮރުވެރިކަމަށް ހާއްސަކޮށް ކުޑަ އިންޓްރެސްޓެއްގައި ދޫކުރާ ލޯނު ސްކީމްއެއް ތައާރަފްކުރުމަކީ ރައީސް މުއިއްޒުގެ ރިޔާސީ ވައުދުފުޅެކެވެ.
