500 ޑޮލަރަށް ލިބޭ އިންޖެކްޝަންއަކަށް 23،000 ރުފިޔާ އާސަންދައަށް ބިލްކޮށްފައި ބޭސްތަކަށް ނުއަގުން ފައިސާ ނަގާފައި އެބަހުރި ކަމަށް އިންސްޕާގެ ސީއީއޯ ހީނާ ވަލީދު ވިދާޅުވެއްޖެއެވެ.
ފޭސްބުކްގައި ކުރެއްވި ޕޯސްޓެއްގައި ހީނާ ވިދާޅުވީ ބައެއް ފަރާތްތަކުން އާސަންދައިން ވިޔަފާރިކޮށް، ބޮޑެތި ނާޖާއިޒް ފައިދާ ނަގައި އުސޫލުން ބޭރުން ކަންކޮށްފައިވާ ކަމަށެވެ.
އެކަމުގެ މިސާލެއްގެ ގޮތުން ހީނާ ވަނީ އާސަންދައިގެ ބޭހުގެ އަގު ރިވައިޒްކުރުމުގެ ތެރެއިން، އެންމެ ހަރަދު ބޮޑު އެއް ބޭސްކަމުގައިވާ “Lucentis Injection” ގެ އަގު ޗެކްކުރުމުގެ ގޮތުން އެ ބޭހުގެ އަގު ހޯދިއިރު އައިކެއާއިން ފޮނުވި އިންވޮއިސް ތަކުން، އެ ބޭސް ގަންނަން ލިބޭ އަގަށްވުރެ ބޮޑުތަނުން ބޮޑުކޮށް އާސަންދައަށް ބިލްކޮށްފައި ވާކަން ފާހަގަ ކުރެވިފައި ވާ ކަމަށް ވިދާޅުވެފައެވެ. އެގޮތުން 500 ޑޮލަރަށް އެ ބޭސް ގެނެސް 23،000 ރުފިޔާއަށް އާސަންދައަށް ބިލްކޮށްފައިވާކަން އޭނާ ފާހަގަކުރެއްވިއެވެ.
ހީނާ ވިދާޅުވީ މިއީ ޑޮލަރަކަށް 18 ރުފިޔާގެ ރޭޓުން ބެލިކަމުގައިވިޔަސް، އެންމެ އިންޖިކްޝަނަކުން ވެސް 14،000 ރުފިޔާގެ ފައިދާއެއް ކަމަށެވެ.
އެ ބޭސް އެތެރެކުރަން ރަޖިސްޓާކޮށްފައި ވަނީ އެހެން ކުންފުންޏަކުން ކަމުގައިވީ ނަމަވެސް އެ ކުންފުނިން އެއްވެސް ވަރަކަށް އެ ބޭސްއެތެރެކޮށްފައި ނުވާކަމަށް ހީނާ ވިދާޅުވިއެވެ. އަދި ލޮލުގެ ފަރުވާގެ ހިދުމަތްދޭ މި ފަރާތުން ބޭސް ވިއްކާފައި ވަނީ ބޭސް އެތެރެކުރުމަށް ރަޖިސްޓަރީނުކޮށް ޕްރިސްކްރިޕްޝަންއަށް ކަމަށް ވެސް އޭނާ ވަނީ ވިދާޅުވެފައެވެ.
ހީނާ ވިދާޅުވީ އާސަންދަ ސްކީމްގެ ތެރެއިން އެ އިންޖެކްޝަނަށް އެންމެ ގިނައިން ބިލްކޮށްފައި ވަނީ އެ ފަރާތުން ކަމަށެވެ. އަދި މޯލްޑިވްސް ފުޑް އެންޑް ޑްރަގް އޮތޯރިޓީގައި ރަޖިސްޓަރީކޮށްފައިނުވާ އިންޖެކްޝަންއަކަށް ބިލުކޮށްފައިވުމާއި، އަގުގެ ބޮޑު ތަފާތަކުން ބޮޑު ފައިދާއެއް ނަގަމުންދިޔަ އިރު އެކަން އާސަންދަ ކުންފުންޏަށް ނުވަތަ ނޭޝަނަލް ސޯޝަލް ޕްރޮޓެކްޝަން އެޖެންސީއަށް އަންގައިފައިނުވާ ކަަމަށެވެ.
ބޮޑުފައިދާއަކާއެކު އިންޖެކްޝަންއަށް ބިލްކުރަމުންދިޔަކަން ފާހަގަކުރެވުނީ އާސަންދައިގެ ބޭހުގެ އަގު ރިވައިޒްކުރުމުގެ މަސައްކަތުގެ ތެރެއިން ކަމަށް ހީނާ ވިދާޅުވިއެވެ. އަދި މިކަން ހުއްޓުވުމަށް ފިޔަވަޅު އަޅައި އެންސްޕާގެ ވެލްފެއާ އެހީގެ ދަށުން މިހާރުވެސް ކޮންޓްރޯލްޑް އަގެއްގައި ބޭނުންވާ ފަރާތްތަކަށް އެ ބޭސް ހޯދުމަށް އެހީތެރިކަން ދެމުންދާކަން އޭނާ ފާހަގަކުރެއްވިއެވެ.
ހީނާ ވިދާޅުވީ މިކަން އިތުރަށް ފުރިހަމަކުރުމުގެ މަސައްކަތް ކުރަމުންދާ ކަމަށާއި އެކި އަމިއްލަ ފަރާތްތަކުން ވިޔަފާރީގެ ފައިދާގެ ބޭނުމަށް އާސަންދަ ބޭނުންކުރުމުގެ ނަތީޖާއެއްގެ ގޮތުން، ރައްޔިތުންނަށް ބޮޑެތި ގެއްލުން ލިބޭކަމީ ހަގީގަތެއް ކަމަށެވެ. މިހެން ދިމާވަނީ ޒަމާނުއްސުރެ އާސަންދަ ނިޒާމްގެ ތެރޭގައި ހުރި މިފަދަ އެތައް މައްސަލައަކަށް އެޓެންޑް ނުކުރެވި ހުރުމުގެ އިތުރުން އެއް ނިޒާމް އަނެއް ނިޒާމާ ވާހަކަ ނުދެކެވި ބޮއްސުންލާން ދޫކޮށްލެވިފައި އޮތުމުގެ ސަބަބުން ކަމަށް ވެސް އޭނާ ވަނީ ވިދާޅުވެފައެވެ.
