ދިވެހިރާއްޖޭގެ ޒަކާތު ހައުސްއިން ދެމުންދާ 'ފުދުންތެރިކަން ނެތް ފަރާތްތަކަށް ދެވޭ ބޭސްފަރުވާގެ އެހީ" ހިދުމަތަށް 'ވަންގަވް' މެދުވެރިކޮށް އެދެވޭ ގޮތަށް ހަމަޖައްސައިފިއެވެ.
އިސްލާމިކް މިނިސްޓަރީން ބުނީ 'ވަންގަވް' އަކީ ދިވެހި ސަރުކާރުގެ ހިދުމަތްތައް ރައްޔިތުންނަށް އަވަސްކަމާއި ފަސޭހަކަމާއެކު އެއް ތަނަކުން ގެނެސްދިނުމަށް ފަރުމާކޮށްފައިވާ ޑިޖިޓަލް ޕްލެޓްފޯމެއް ކަމަށެވެ.
ދިވެހިރާއްޖޭގެ ޒަކާތު ހައުސްގެ ހިދުމަތްތައް ވަންގަވް މެދުވެރިކޮށް ލިބޭނެ ގޮތް ތައާރަފްކުރުމަށް މިއަދު ހެނދުނު އިސްލާމިކް މިނިސްޓްރީގައި ބޭއްވި ރަސްމިއްޔާތުގައި މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވީ މި ހިދުމަތަކީ ރައްޔިތުންނަށް ލުއިފަސޭހަކަމެއް ލިބިގެންދާނެ ހިދުމަތަކަށް ވެގެންދާނެކަމަށެވެ. މި ހިދުމަތް ތައާރަފްކުރުމަށް ޒަކާތު ހައުސްގެ މުވައްޒަފުންނާ، ޓްރޭޑްނެޓްގެ މުވައްޒަފުންކޮށްފައިވާ މަސައްކަތް ފާހަގަކޮށް އެކަމަށްޓަކައި އެ މުވައްޒަފުންނަށް މިނިސްޓަރީން ވަނީ ޝުކުރުއަދާކޮށްފައެވެ.
ދިވެހިރާއްޖޭގެ ޒަކާތު ހައުސްގެ ބޭސްފަރުވާގެ ހިދުމަތް ވަންގަވްއަށް ގެނެސްފައިވަނީ ރައްޔިތުންނަށް ވީހާވެސް ލުއި ފަސޭހަކަމާއި އަވަސްކަމާއެކު ހިދުމަތެއް އެދެވޭނެ ގޮތަށެވެ. މިނިސްޓްރީން ބުނީ މި ހިދުމަތް ތައާރަފްކުރުމާއެކު މިއަދުން ފެށިގެން ކައުންޓަރަށް ނުވަތަ އީމެއިލް މެދުވެރިކޮށް ޒަކާތުގެ ބޭސްފަރުވާގެ އެހީއަށް އެދި ހުށައަޅާ ފޯމުތައް ބަލައިނުގަންނާނެއެވެ.
