މިއަހަރުގެ އޮގަސްޓު މަހުގެ ތެރޭގައި ޒަކާތުގެ އެހީގެ ގޮތުގައި ޖުމުލަ 5.1 މިލިއަނަށް ވުރެ ގިނަ ރުފިޔާ ދޫކޮށްފައިވާ ކަމަށް މޯލްޑިވްސް ޒަކާތު ހައުސްއިން ހާމަކޮށްފިއެވެ.
ޒަކާތު ހައުސްއިން އާންމުކޮށްފައިވާ ތަފާސްހިސާބުތަކަށް ބަލާއިރު، މިދިޔަ އޮގަސްޓު މަހު ޒަކާތުގެ އެހީގެ ގޮތުގައި ޖުމުލަ 5,170,675.91 (ފަސް މިލިއަން އެއްލައްކަ ހަތްދިހަ ހާސް ހަސަތޭކަ ހަތްދިހަ ފަސް ރުފިޔާ ނުވަދިހަ އެއް ލާރި) ވަނީ ދޫކޮށްފައެވެ. މިއީ މިދިޔަ އަހަރުގެ އޮގަސްޓު މަހު ބެހި 4,615,944.84 ރުފިޔާއާ އަޅާބަލާއިރު 12 އިންސައްތައިގެ އިތުރުވުމެކެވެ.
އޮގަސްޓު މަހު ޒަކާތުގެ އެހީ އެންމެ ބޮޑަށް ދޫކޮށްފައިވަނީ ފަގީރުންނާއި މިސްކީނުންގެ ބައިންނެވެ. އެ ބަޔަށް ޖުމުލަ 2,358,675.66 ރުފިޔާ ހޭދަކޮށްފައިވެއެވެ. މީގެ ތެރޭގައި ބޭސްފަރުވާގެ އެހީގެ ގޮތުގައި ދޫކުރި 2,316,175.66 ރުފިޔާއާއި ޒަރޫރީ ބޭނުންތަކަށް ދޫކުރި 42,500 ރުފިޔާ ހިމެނެއެވެ.
ދެން އެންމެ ބޮޑު ހޭދައެއް ކޮށްފައިވަނީ ފީސަބީލިﷲގެ ބަޔަށެވެ. އެއީ ޖުމުލަ 2,544,823.64 ރުފިޔާއެވެ. އެގޮތުން ފީސަބީލިﷲގެ ބައިން:
- ދީނީ ޕްރޮގްރާމްތައް ހިންގުމަށް: 1,047,219.50 ރުފިޔާ
- މަތީ ތައުލީމު ފުރިހަމަކުރުމަށް: 797,604.14 ރުފިޔާ
- ފޮތްތައް ތަރުޖަމާކުރުމަށް: 579,585.40 ރުފިޔާ
- ހިފްޒު ޕްރޮގްރާމްތަކާއި ކީރިތި ގުރްއާނުގެ އިލްމު ފެތުރުމަށް: 120,414.60 ރުފިޔާ ވަނީ ހޭދަކޮށްފައެވެ.
މީގެއިތުރުން، ދަރަނިވެރިންނަށް އެހީވުމުގެ ބައިން (އަލްޣާރިމީން) 60,061 ރުފިޔާ ދޫކޮށްފައިވާއިރު، ހާލުގައި ޖެހިފައިވާ ދަތުރުވެރިންގެ ބައިން (އިބްނުއްސަބީލް) 19,834.02 ރުފިޔާ ވަނީ އެހީގެ ގޮތުގައި ދޫކޮށްފައެވެ.
ޒަކާތު ހައުސްގެ ތަފާސްހިސާބުތަކުން ދައްކާ ގޮތުގައި، 2026ވަނަ އަހަރުގެ އޮގަސްޓު މަހުގެ ތެރޭގައި ޒަކާތު ފަންޑަށް އާމްދަނީގެ ގޮތުގައި 7,353,416.98 (ހަތް މިލިއަން ތިންލައްކަ ފަންސާސް ތިންހާސް ހަތަރުސަތޭކަ ސޯޅަ ރުފިޔާ ނުވަދިހަ އަށް ލާރި) ވަނީ ލިބިފައެވެ.
