ގއ. ގެމަނަފުށީ ބޭސްފިހާރައިން ބޭހެއް ނުލިބިގެން، ހިތްހަމަނުޖެހުން ފާޅުކޮށް އެތަނުގައި ހަމަނުޖެހުން ހިންގައިފިއެވެ.
'ދަ ޕްރެސް' އަށް މައުލޫމާތު ދެމުން ގެމަނަފުށިން ވާހަކަދެއްކި މީހަކު ބުނީ ބޭސްފިހާރަށް ވަދެ ހަމަނުޖެހުން ހިންގާފައިވަނީ އުމުރުން ދުވަސްވީ އަންހެނެއް ކަމަށެވެ. އެ އަންހެން މީހާގެ ފިރިމީހާއަށް ބޭނުންވާ ބޭސް ނެގުމަށްޓަކައި ބޭސް ފިހާރައަށް ދިޔައިރު އެތަން ބަންދުކޮށްފައި ހުރުމުން ދެވަނަ ފަހަރަށް އޭނާ އެތަނަށް ދިޔައީ މަރުތޭލެއް ހިފައިގެން ކަމަށެވެ.
އިތުރަށް މައުލޫމާތު ދިން ފަރާތުން ބުނީ އެ އަންހެން މީހާ މަރުތޭލެއް ހިފައިގެން ދިޔައިރު ބޭސް ފިހާރަ ހުޅުވާފައިވާ ކަމަށާއި، އެ ވަގުތު އޭނާ އެތާ އެތެރެއަށް ވަދެ ހިތްހަމަނުޖެހުން ފާޅުކޮށް އަޑުގަދަ ކޮށްފައިވާ ކަމަށެވެ. އެހެންނަމަވެސް މާރާމާރީއެއް ހިންގާފައި ނުވާކަމަށް އެ ރަށުން ވާހަކަދެއްކި ފަރާތުން ވަނީ ބުނެފައެވެ.
ގެމަނަފުށީ ބޭސް ފިހަރަ އިން ބޭހެއް ނުލިބިގެން ހިތްހަމަނުޖެހުން ފާޅުކުރި މައްސަލައެއް ރޭގެ ވަގުތެއްގައި ރިޕޯޓްކޮށްފައިވާ ކަމަށް ފުލުހުން ވަނީ ބުނެފައެވެ. މި ކަމާއި ގުޅިގެން ބޭސް ފިހާރައިގައި އިން މީހާ ބިރުގަތުމުގެ ސަބަބުން ސިއްހީ މަރުކަޒުގައި ފަރުވާދިނުމަށްފަހު ގެއަށް ދޫކޮށްލާފައިވާކަމަށް ފުލުހުން ވަނީ ބުނެފައެވެ.
މި މައްސަލަ އާއި ގުޅިގެން އެމީހާ ހައްޔަރުކޮށްފައި ނުވާއިރު ފުލުހުން ބުނީ މައްސަލަ އިތުރަށް ތަހުގީގުކުރަމުން އަންނަކަމަށެވެ.
